«Vánddardit by Márkomeannu» lea namma dáiddavánddardeamis mii lágiduvvui Tromssas mannan vahkkoloahpa.
Ja, mii son dat dáiddavánddardeapmi lea?
– Guossit čuvvo ofelačča guhte sin láidestii iešguđetge báikkis báikái Tromssa gávpogis.
– Dáin báikkiin ledje iešguđetlágan dáidaga dahje guoimmuheapmi, muitala «Vánddardit by Márkomeannu» buvttadeaddji Ellen Berit Dalbakk.
Dalbakk čilge NRK:i ahte inspirašuvdna vánddardeapmái boahtá Márkomeanuid Kulturmeahcis. Doppe besset guossit vánddardit meahcis ja vásihit iešguđegelágan kulturdáhpáhusaid.
Festivála guossin festiválas
«Vánddardit by Márkomeannu» lágiduvvui «Vårscenefest» nammasaš festivála oktavuođas.
– Mis lea máŋga jagi juo leamaš dáhttu ahte «Vårscenefest» festiválas maiddái galgá oktavuohta Sápmái. Danin jearaimet diibmá Márkomeanuid ovttasbargat minguin, dadjá «Vårscenefest» preassaovddasvástideaddji Therese Bakkevoll.
Sii válde dasto oktavuođa Kulturráđiin guhte bivde sierra čoahkkima, go eai lean ovdal gullan dakkárlágan ovttasbarggu birra gos muhtin festivála lea guossi nuppi festiválas.
Kulturráđi mielas lei buorre jurdda, muitala Bakkevoll, ja ožžo ruhtadoarjaga dáhpáhussii.
– Miella joatkit
Dalbakk lea duhtavaš čađahemiin.
– 49 olbmo bohte čuovvut vánddardeami, ja meinnestuvai bures ja olbmot ledje duhtavaččat. Mis lea miella fas čađahit dán boahtte jagi, dadjá Ellen Berit Dalbakk.
Gussiid ofelaš lei Siri Broch Johansen. Vánddardeaddjit besse fitnat earret eará Sámedikki kantuvrras, Tromssa girjerájus ja guovtti museas.
Dás oainnát muhtin artisttaid ja dan maid besse vásihit vánddardeami oktavuođas:
