Har ikkje gitt opp å få Snowden til Noreg

Styret i Bjørnson-Akademiet håpa i det lengste at dei skulle få ta imot verdas mest ettersøkte mann under Bjørnsonfestivalen i Molde denne veka, men har no innstilt seg på at stolen til den spionsikta amerikanaren Edward Snowden blir ståande tom under prisutdelinga i Molde laurdag.

– Det er sjølvsagt veldig trist at han ikkje kjem, men vi er ikkje så veldig overraska over det, seier Hege Newth Nouri, president i Bjørnson-Akademiet.

Ho fortel likevel at alt er på plass før utdelinga av prisen laurdag klokka 11.00.

– Då vil han vere med direkte på Skype, og alle har moglegheit til å få det med seg, seier Newth Nouri.

• Les også: Tom stol for Snowden på prisutdeling: – Feigt av norske politikere

Vil gå rettens veg om nødvendig

Varslaren Snowden får Bjørnson-prisen 2015 for sitt arbeid for personvernet, og for å rette eit kritisk søkelys mot statar si overvaking av eigne og andres innbyggarar.

Norske myndigheiter har så langt ikkje ville gi Snowden garanti for at han ikkje blir utlevert til USA om han kjem til Noreg for å ta imot prisen. I slutten av august vart det kjent at amerikanske myndigheiter har bedt Noreg om å utlevere Snowden så fort han sett sine bein i landet.

Bjørnson-Akademiet har likevel ikkje gitt opp håpet om å få han til Noreg, og er villige til å gå rettens veg for å få det til.

– Vi jobbar kontinuerleg med å få han hit til Noreg, slik at han kan ta imot prisen personleg, seier Newth Nouri.

• Les også: USA ba Norge arrestere Edward Snowden

Gir ikkje opp håpet

Snowden avslørte USA si overvaking av andre statar i 2013, og har vore på flukt frå amerikanske myndigheiter som meiner Snowden er ein spion.

Snowden bur no i skjul i Russland etter at han fekk forlenga opphaldsløyvet sitt med tre år i 2014.

Bjørnson-akademiet håpar framleis å kunne gi Snowden Bjørnson-prisen i Noreg, men har også vurdert å overrekke den på grensa mellom Noreg og Russland.

– Kor tolmodige kjem de til å vere?

– Vi er sjølvsagt veldig utolmodige og har lyst å få han hit så snart som råd, men vi er også innstilt på at det tek den tida det treng, seier Thomas Hylland Eriksen, styremedlem i Bjørnson-Akademiet.

– Men vi håpar at Snowden kan få kome trygt til Noreg, og at Noreg med det kan markere si sjølvstende frå USA, noko eg meiner vil vere veldig bra for den norske stat, held han fram.

• Les også: Slik ba Snowden om asyl i Norge
• Les også: Vurderer Snowden-pris på russergrensen