Vil ha Pokémon Go inn i undervisninga

– Det blir kanskje ikkje like mykje speling som det har vore i sumarferien, for vi har jo lekser og skule, seier Ida Skappel.

Saman med spelande familiemedlem har ho funne vegen til Frognerparken i Oslo for å gjere siste innspurt i den digitale Pokémon-jakta før sumarferien er over.

I sumar har mobilspelet Pokémon Go rast som ein farsott over verda. Spelet, som er basert på 90-talsspelett frå Japan, går ut på at spelarane beveg seg rundt i den verkelege verda for å fange virtuelle Pokémon-monster.

• Les også: – Pokémon er bare begynnelsen på en stor spill-trend
• Les også: Pokémonjakt gir bysykkel-rekord

Vil lære gjennom spel

Men om norske spelpedagogar får det som dei vil, treng ikkje skulestart bety slutten for Pokémon-spelinga til Skappel.

Ifølgje Tobias Staaby, spelpedagog ved Nordahl Grieg Vidaregåande Skule i Bergen, passar mobilspelet Pokémon Go godt til undervisning, til dømes i historie.

– Spelet er av og til er knytt til historiske minnemerke, der spelarane får opp litt tekst med informasjon om det dei ser. For eksempel kven ein statue er av. Slik kan spelet til dømes nyttast i eit prosjekt i lokalhistorie. Elevane går ut og leiter etter slik informasjon i nærleiken av der dei bur, og skriv ei oppgåve om det dei finn, seier Staaby.

Zombie-etikk

Dette er ikkje fyrste gong Staaby nyttar spel i undervisninga. Tidlegare har han mellom anna nytta zombie-spelet «The Walking Dead» som grunnlag for diskusjon i etikk og religion, og med det fått omtale i internasjonal spelpresse.

– Den mest universelle grunngjevinga for spel i skulen er at barn lærar gjennom opplevingar, og alle spel er opplevingar, seier Staaby.

Han trur at ein fordel med Pokémon Go og liknande spel, er at dei opnar for ein måte å ta læringa ut av klasserommet.

– Ikkje for alle lærarar

– Pokémon Go eller andre kommersielle spel kan ha mange positive aspekt for undervisninga, seier Eirik Jåtten, rektor ved Revheim ungdomsskole i Stavanger, som har ein master i bruk av IKT i skulen.

Ved sidan av ulike variantar av kroppsøving, synest Jåtten at Pokémon Go har potensial. Han meiner at motivasjonsfaktoren er det viktigaste, men at spel ikkje er eit magisk vedundermiddel for å gjere skule gøy.

– Spel er ikkje for alle lærar, men spel kan vere ein del av eit stort metodeutval som kan brukast for å skape god læring for den enkelte elev, seier Jåtten.

Ifølgje Skappel, som snart returnerer til skulebenken, er det ein god ide å nytte Pokémon Go i undervisninga.

– Det kunne vore ein fin skuleoppgåve, seier Skappel.