Gruar seg til å synge opera

Ti artistar, ti musikksjangrar og ti laurdagskveldar med direktesendt underhaldning.

Det er oppskrifta bak det norskutvikla konseptet «Stjernekamp», som kjem på NRK til hausten.

Alt kan skje når kjente norske artistar frå ei rekkje sjangrar skal prøve seg i alt frå opera til hiphop.

Og etter kjent oppskrift er det sjåarane som bestemmer kven som får gå vidare.

• LES OGSÅ: NRK lager musikk-variant av «Mesternes Mester»

– Ikkje farleg å drite seg ut

Sjåarane kan glede seg til å sjå artistar «ute av sitt element» når det gjeld sjanger.

– Eg gruar meg mest til å synge opera, seier Alejandro Fuentes.

Det gjer også dei fleste av dei andre artistane som skal vere med. Sett bort frå operasongaren Rein Alexander sjølvsagt.

– Det er moro at dei gruar seg til opera. Sjølv gruar eg meg til alt som er raskt og har mykje tekst, seier han.

Rein Alexander sa ja til å vere med før han fekk vite at reggae-prestasjonane hans skulle bli direktesendt.

– Eg har lært at det ikkje er så farleg å drite seg ut på TV. Det er berre å gi alt og håpe på å vere med så lenge som mogleg, seier han.

• LES OGSÅ: Sjå Kristian Valen imitere Morten Harket som 13-åring

«Titans vs. titans»

Vibeke Sørlie, kjent frå mellom anna So You Think You Can Dance Norge, er kvinna bak ideen.

– Eg tenkte det hadde vore kult om Norge kunne vere avsendar av eit nytt konsept, som også kan slå an i utlandet, seier ho.

– Sendeflatene blir jo dominert av talentkonkurransar. Eg tenkte: «Eg vil sjå artistane og førebileta våre prøve seg på noko nytt, og vise oss korleis det skal gjerast», seier ho.

Men det blir ikkje berre ein artist på scena som syng ein sang, ifølgje Vibeke.

Det blir song, dans og show i eit visuelt storslagent direktesendt program.

• LES OGSÅ: Bruker TV’en som hundepasser

(Saka held fram)

Møtes igjen

Kåre Magnus Bergh, Ole Evenrud og Alejandro Fuentes møtes igjen sju år etter at dei var del av ei anna songkonkuranse, nemleg «Idol».

– Det er sært å jobbe saman med dei igjen. Dei har ikkje forandra seg så mykje. I alle fall har dei ikkje blitt noko høgare, seier Kåre Magnus Bergh spøkefullt.

– Ja, eg fekk litt «flashback» i stad. «Der er dei igjen», liksom. På ein veldig positiv måte sjølvsagt, seier Alejandro Fuentes.

– Eg har blitt meir moden og veit kva det går i no. Så dette blir veldig spanande og moro, seier han.

Om Alejandro og dei andre klarar å synge opera får du sjå til hausten på NRK1.

• LES OGSÅ: KORK blir sportsorkester