Dette biletet er tatt av den beste fotografen i verda

34 år gamle Alejandro Chaskielberg vart kåra til den beste fotografen i verda i går. Han vann for serien «High Tide», som han tok medan han budde hjå innbyggjarane ved elvedeltaet Parana i Argentina. Det er ein portrettserie som er tatt om natta, over to år.

Juryen syntest ikkje det var vanskeleg å kåre Chaskielberg til vinnar av konkurransen.

Brukte fullmånen

Alejandro Chaskielberg har jobba som fotograf sidan han var 18 år, då han byrja i lokalavisa.

«Eg brukte fullmånen som eit nøkkelelement i komposisjon og lyssetting, medan innbyggjarane heldt seg i ro i opptil ti minutt. Lang eksponeringstid kombinert med fullmånen gjer at eg kan kunstig lyssette delar av landskapet», seier Chaskielberg sjølv om vinnarbileta i ei pressemelding.

Intensjonen hans var å presentere ein annan versjon av Parana-deltaet og samfunnet der, som han meiner er blitt ignorert. Fotografen er sjølv frå Argentina.

Førsteprisen er på 25.000 amerikanske dollar og vart delt ut på ein seremoni i London onsdag kveld.

Kjøpte første kamera i 2006

Chan Kwok Hung vart beste fotograf i open klasse for det dramatiske biletet «Buffalo Race».Den 37 år gamle smykkeprodusenten frå Hong Kong kjøpte sitt første kamera i 2006 og lærte seg sjølv å fotografere gjennom bøker og Internett.

Biletet er tatt i Indonesia, der det kvart år blir arrangert okselaup før innhaustinga byrjar. Om oksen din vinn er det eit teikn på at det blir ein god sesong.

Sjå fleire fotosaker frå NRK.no:

• Slik har du ikkje sett McCartney før
• Det beste av norsk dokumentarfoto
• Fotografen som vart gløymt
• Se hva han fant på skattejakten

Våpenindustrien i Latin-Amerika

Spanjolen Javier Arcenillas vann i to klasser, både for beste profesjonelle samtidsfoto og nyheitsfoto. Han har mellom anna dokumentert eit av dei mest populære og profesjonaliserte yrka i Latin-Amerika: Våpenmenn, ifølgje Arcenillas.

Noreg nådde ikkje opp

Den amerikanske fotografen Bruce Davidson fekk pris for framifrå innsats gjennom ei årelang fotokarriere. 77-åringen følgde mellom anna ein Brooklyn-gjeng på 1950-talet og dokumenterte borgarrettigheitskampen på 1960-talet. Han har vore medlem av fotobyrået Magnum sidan 1958.

I tillegg vart det delt ut prisar for beste profesjonelle fotograf i klasser som sport, reise, livsstil, portrett, arkitektur og konseptfoto.

Over 105.000 fotografi var med i konkurransen, frå 162 land. Frå Noreg var Espen Rasmussen representert, men han nådde ikkje opp blant dei fremste fotografane i verda.