«Kongens nei» kjempar mot desse om Oscar-statuetten

Dei 85 deltakarane som kjempar om Oscar for beste framandspråklege film er annonsert. Deltakarlista slår rekorden på 83 frå 2014, skriv The Guardian.

Tysk favoritt

Nøkkelutfordrarane til «Kongens nei» slik det ser ut nå, er blant anna den tre timar lange tyske komedien «Min pappa Toni Erdmann», som mange meiner fortente Gullpalmen under årets Filmfestival i Cannes.

Også den franske kandidaten «Elle» blir trekt fram som ein heit kandidat til å vinne Oscar, skriv The Guardian.

Les også: «Kongens nei» er årets mest sette film

Les også: «Kongens nei» blir norsk Oscar-kandidat

På lista finn vi kjente namn som Asghar Farhadi. I 2011 vann Farhadi Irans første Oscar med filmen «A Separation». Hans seinaste film heiter «The Salesman», og handlar om eit iransk kjærleiksforhold som er i ferd med å gå i oppløysing.

Italias bidrag, «Havet brenner» har alt fått merksemd i Norge. Dokumentaren, laga av Gianfranco Rosi, handlar om livet på Lampedusa og flyktningekatastrofen som råka den sicilianske øya.

85 filmar skal bli til 5

I desember blir ei kortliste på ni filmar avslørt. Og 24. januar blir det kjent kva fem filmar som blir nominert i kategorien for beste framandspråklege film. Dette skjer samstundes med at alle dei andre nominasjonane blir gjort kjent. Oscar-utdelinga finn stad 26. Februar 2017.

I år var det László Nemes som vann Oscar for beste framandspråklege film med Auschwitz-dramaet «Sauls sønn».