Hopp til innhold

Dakkár skåvllå vájbi hásstalusájt tjoavddá

– Ájnas la máná dási tjanáduvvi, ja sjaddá juoga mav dåbddi. Ja mån lav de riek ávon jus dá ájádusá guodtjasi profijllaskåvlåv ásadit.

Anja Skjelnes

DUDÁLASJ. Anja Skjelnes la mielos, ja juo åvddålijguovlluj vuojnná jus dal dakkár skåvlås mige sjaddá.

Foto: Sander Andersen / NRK

Dát javllamus boahtá æjgádis Anja Skjelnes guhti l Ájluovtas Hábmerin. Skjelnes ávvus gå oadtju diehtet suohkanin lij ájádusá sáme profijllaskåvlåv suv sijddabájken ásadit.

Kurt Fossvik, guhti l Hábmera suohkana sadjásasj suohkandirektørra javllá Svieriga Sámeradioj suohkan sihtá julevsáme profijllaskåvlå ájádallamijs åvdåsvásstádusáv válldet.

Fossvik la tjielgas gå la sáhka julevsáme profijllaskåvlåv ásadit.

– Jus julevsámegiella galggá bissot, de la muddo dájna barggagoahtet, tjuottjot sån.

Vejulasjvuoda

Ulmme profijllaskåvlåv ásadit la dagu sámegielav nannitjit ja sáme kultuvrav bisodahttet.. Akta dajs sámegielajs mij la ienemusát ájtedum la julevsámegiella.

Kurt Fossvik dárbojt vuojnná, ja vejulasjvuodajt vuojnná dákkár skåvlåjn gånnå giella tjalmostahteduvvá.

Kurt Fossvik

HÁSSTALUSÁ. Sadjásasj suohkandirektørra Kurt Fossvik vuojnná dárbojt julevsáme profijllaskåvlåjn, ja vejulasvuodajt dakkár skåvlåv oadtjot sadjásis.

Foto: Kjell Mikalsen / NRK

– Gå giella l ájtedum, de la dan diehti gássjel dagu åhpadiddjijt åttjudit gudi máhtti mijá skåvlåjn barggat. Jus ælla åhpadiddje gudi gielav máhtti, de la alvos hásstalus. Duodden aj fájllu ållo oahpponevvaga.

Fossvik dættot suohkan i aktu dájna nagáda. Ja sån aj sihtá æjgáda, oahppe ja åhpadiddje bessi maŋen dákkár skåvlåv hábbmitjit.

– Sihtap sijájt maŋen skåvlåv hábbmitjit nav vaj dåbddi æjggu dav. Dat la ájnas, javllá Kurt Fossvik.

Hásstalusájt tjoavddá?

Anja Skjelnes guorras viertti skåvllå mav máná dåbddi, ja duodden aj skåvllå mij nannusit sámekultuvrav vielet.

– Mánájda la ájnas skåvlåv dåbddi. Duodden aj la ájnas gåktu l sáme pedagogihkalasj vuohke. Ájnas máná dåbddi dav aj. Dát la mijá vuohke, ja dasi mån gulluv, javllá Anja Skjelnes.

Skjelnes la ávon jus dal ásaduvvá.

– Diehtep man gássjel la sámegielåhpadiddjen barggat. Mij æjgáda lip juo javllam dárbbo l ulmutjijt sámegielbargguj rekrutterit, ja giellabargov organiserit. Vájbi profilskåvllå l tjoavdos dasi?

Moadda ietjá vejulasjvuoda

Suohkandirektørra aj nammat oahpponevvaga ma fájlluji julevsámegiellaj, ja dat la juoga mij galggá sadjásis dakkár skåvlån. Duodden vuojnná Fossvik dát la skåvllå divna julevsáme oahppijda vájk gånnå Vuonarijkan årru.

– Dákkár skåvlån la aj vejulasj dagu gájdosåhpadimev ásadit ja åvddånahttet, ja dassta åvdåsvásstádusáv válldet, javllá sån.

Dille l værámus

Oalgesbelludagá sámedikkeájras Lars Filip Paulsen javllá NRK:j Vuona almulasj tjielggidusán Vájmogiella (NOU 2016: 18) tjuodtju profijllaskåvllå galggá juohkka almulasj sámegielan.

Lars Filip Paulsen

Lars Filip Paulsen aj barggá Hábmera suohkanin sámerádediddjen. Paulsen mujttádahttá mav Rijkadárkásus tjálij rappårtån sámegielåhpadime birra.

Foto: Dan Robert Larsen / NRK

Paulsen aj mujttádahttá Rijkadárkástus guhti l tsuojggim sáme oahppijda la riektá åhpadibmáj sámegiellaj ja sámegielan.

– Moadda vánesvuoda lij dagu oahpponevvaga ja åhpadiddje. Ja julevsámegielan la dille værámus, javllá Paulsen.

Korte nyheter

  • Biebmadumguolle vuobdem lassánij dijmmá

    Guollimdirektoráhtta li båddåsasj lågojt almodam akvakultuvra hárráj dijmátjis.

    2021 lassánij biebmadumguolle vuobdem, 10,2 prosenta ienebu gå 2020. Luossavuobdem lassánam ienemusát ja duodden dasi jáddi ja bálddá. 94 prosenta majs vuobdeduvvin ålles 2021 lej luossa.

    Dáv tjállá Kyst og Fjord.

  • 28. mai er internasjonale mens dagen

    En ny befolkningsundersøkelse fra CARE i Norge viser at kvinners tabu knyttet til menstruasjon sakte men sikkert synker. Til tross for det er det mye skam knyttet til mensen for kvinner. Undersøkelsen sammenligner kvinner og menns holdninger. Noe som bland annet viser at fler kvinner enn menn synes det er ekkelt eller skittent med mens. Fler kvinner enn menn skjemmes over å handle mensproduketer.

    Les hele undesøkelsen her.

  • Rijkajgasskasasj liejbbebiejvve

    28. biejve moarmesmáno l rijkajgasskasasj liejbbebiejvve. CARE li dahkam ådå álmmukguoradallamav Vuonan mij vuoset nissuna vilá skámádi ja berusti ietjas liejbe birra. Ienep nissuna gå ålmå adni liejbbe l duolvas jali vuovnná ja ienep nissuna gå ålmå skámádi oasestit liejbbebuvtajt buhtikan.

    Valla lågo aj vuosedi tabu liejbe birra sáhkadit binnuji jages jáhkáj.

    Dála l guoradallam.

    På norsk.

    Vi snakket med unge i Bodø om mensen