Studeanttat sáddejit reivviid ja dollet cyberfeasttaid

Les på norsk: Sender brev og holder cyberfester

– Lea hástaleaddji go ii sáhte leat nu sosiála go háliidivččii, lohká Ingrid Sundberg (25).

25-jahkásaš studere Romssas ja jođiha Sámi Studeanttasearvvi Davvi-Norggas(SSDN).

Dábálaččat Ingrid deaivvada máŋgasiiguin juohke beaivve, muhto go universitehta mearridedje giddet koronavirusa geažil de son ferte bissut ruovttus.

Áigegollun son doallá oktavuođa olbmáiguin nugo olbmot ovdal lávejedje.

Sádde reivviid

Ingrid čállá reivviid olbmáide, maid doalvu sin boastakássaide, ja sii dahket dan seammá.

– Lea hui somá oažžut albma reivviid, iige dušše gulahallat sosiála median. Dat dološ gulahallanvuohki lea veahá badjelgehččojuvvon dálá áiggis, muhto lea hui hávski, dadjá Ingrid.

Son orru ovttas njelljii earáin kollektiivvas, ja go eai beasa mannat gosage de sii leat fuomášan bargat feara maid guovtti maŋemus vahkkus.

– Mii leat ráhkadan gokčasiiguin bartta stohpui,gos leat geahččan filmmaid. Mii leat maid leamaš čierastallame luohkás gos eai leat earát, ja leat ráhkadan muohtabiejuid, dolastallan ja doallan fotoshootaid, dadjá son.

Ingrid muitala ahte eanáš studeanttat geaiguin son láve gulahallat eai datte jierásnuva ođđa dilálašvuođain, muhto dieđusge buohkat leat veaháš dolkan dušše ruovttus čohkkát.

Neahttafeasta ja konsearta

Dán mearkkaša Anna Linnea Fjellheim Varsi (23) bures.

– Mun lean hui sosiála. Nu ahte dušše čohkkát ruovttus lea oalle giksin munnje, muhto maid dál diehtá. Dát lea dat áidna vuohki mot mun dál sáhtán veahkehit servodaga.

Vaikko son dál ii beasa mannat gosage, de mearkkaš dat ahte son ii sáhte sosialiseret.

– Go ii sáhte deaivvadit, de ferte hutkat eará vugiid mot ovttastallat, lohká son.

Mannan vahkkoloahpa son bovdii olbmáid festtii maid lágidii neahtas.

– Go SlinCrazes galggai leat skearroalmmuhankonsearta neahtas, de jurddašin ahte dán mii sáhttit fárrolaga geahččat sosiálamedian. Dan sadjái go ahte juohkehaš čohkká ruovttus akto ja geahččá konseartta.

Nu sii deaivvadedje ovdafestii, dego livčče jođus albma konsertii. Erohus lei dušše ahte deaivvadedje neahtas.

– Mis lei virtuála- feasta neahtas, gos mii čiŋadeimmet ja humadeimmet ovdal konseartta. Go konsearta álggii, de mii gulahalaimet, dánssuimet ja lávlluimet vaikko eat lean seammá viesus.

Anna Linnea mielas dieđusge ii šatta neahttadeaivvadeapmi seammá go albma deaivvadeapmi, muhto ná sáhttá aŋkke suohtastallat earáiguin.

– Šaddá dieđusge hui earálágan feasta go dat masa lea hárjánan, muhto lea aŋkke somá go beassá ovttastallat olbmáiguin. Lea hui #2020, dadjá son.

Studeanttat šaddet errenáigái

Anna Linnea lea dál mannan ruoktot Plassjii. Son ferte leat ruovttus čađat guokte vahkku errenáigge geažil. Plassje suohkan lea mearridan errenáiggi buot studeanttaide geat bohtet ruoktot stuora gávpogiin.

– Mun gal in duostta rihkkut makkárge njuolggadusaid. Jus mus lea koronavirus, de sáhtán dagahit nuppi olbmo jápmima. Nu ahte mun gal bisun ruovttus, dadjá son.

Anna Linnea cavgila movt sáhttá earáiguin doalahit oktavuođa, go ii sáhte deaivvadit nugo dábálaččat:

Journalistta nieida lei okta dain gii lei mielde Anna Linnea neahttafeasttas.