Dovdá fámohisvuođa – debutere lávlagiin ja dadjá «mun in gávdno»

Máŋga artistta vižžet inspirašuvnna iežaset eallimis go čállet lávlagiid. Nu dagai maid Ramona Kappfjell Sørfjell go čálii «Im veasoeh». Lávlaga lea ráhkadan ovttas Markus J. Thonhaugenin (DJ Idja).

Fámuhisvuohta ja doaivva

Šuokŋa lea čállon máttasámegillii ja gieđahallá hástalusaid maid boazodoallu dál ferte čoavdit ođđaáigásaš industriija sisabahkkemiid ja boraspiriid dihtii.

– Justa dál huksejuvvo guohtunguovlluin ja mii eat sáhtte maid ge dahkat earret go geahččat ahte dat dáhpáhuvvá.

«Im Veasoeh», dahje «In gávdno», čalmmustahttá dan fámuhisvuođa maid Ramona dovdá justa dál. Šuokŋa govve miesi rahčamuša máilmmis mii dađistaga rievdá ja mo dat ceavzá varalaš máilmmis. Muhto das lea doaivva maid.

– Miessi birge eatnis, aaltoe, vehkiin. Loahpas miessi vuoitá ja nákce návccainis čuožžilit.

Guldal ođđaseamos sámi musihkka dás:

Sámi House

Musihka lea DJ iDJa bidjan. Son lea beaggán Sámi House musihkain, masa lea darvehan luođi. Sutnje lea musihkka leamaš hui mávssolaš go lea oahpásmuvvan iežas sámi duogážin.

– Sávan ahte musihkka maiddái buvttašii ilu ođđa buolvvaide go besset eatnigillii guldalit.

Markus lea bargan ja geahččaladdan olu dáinna šáŋŋeriin. Ulbmil lea ovttastahttit musihkkaárbbiid guovtti iešguđetlágan kultuvrrain ja čorget saji luohtái dánsunlávdái.

– Meavrresgáris lea simbolaárvu ja sáhttá leat čaffat jus geavaha vuollegašvuođain atná dan árvvus. Luohti lea goit ge vuođđun mu musihkkii.

Nuorra taleanta

Nuorat buolvvas maid leat dál fuomášan Sámi House šáŋŋera. 22 jahkásaš Lars Jakob Muotka Unjárggas geavaha artistanama Savza ja ráhkada House musihkka. Sámi musihkka ii leat dássážii báidnan su musihka, muhto dat dáidá dál rievdat.

– Mun lean guldalan olu Akkil ja Ivan Buljo. Dan maid soai ráhkadeaba lea hui čaffat.

Ieš lohká Muotka jáhkkit ahte livčče čaffat geavahit osiid boares sámi slägeriid ja ráhkadit House šuoŋaid das. Dát vuohki lea leamaš guhkká jo geavahusas šáŋŋeris. Luođi maid jáhkká leat buorre seaguhit House musihkain.

– Ii ahte dat dárbbaša duođaštusa. DJ iDJa lea jo čájehan ahte luohti ja House lea buorre kombo.

Urbi

Nyheter og innhold om samisk musikk