– Mii sávvat mii nagodit fállat guovttegielat geahččalemiid tulkkaide giđđat juo, lohká Joret Mihkkal Bals.
Son lea Sámi allaskuvlla tulkaoahpahusa ráđđeaddi.
2007:a rájes gitta 2022 rádjai lei tulkaoahpahus Oslo universitehtas, mii dál gohčoduvvo OsloMet. Sis lea gaskkohagaid leamaš sámegiel tulkaoahpahus, muhto áibbas moadde sápmelačča leat čađahan dien oahpu.
Go ođđa tulkonláhka bođii ođđajagis dán jagi, de sirde eiseválddit Sámi allaskuvla háldui fuolahit sámegiel tulkkaid oahpahusa.
Allaskuvla áigu álgo jagiid ain ovttas bargat OsloMet`ain, muhto dađistaga sirdet stuorát oasi tulkaoahpahusas Sápmái.
Bals sávvá ahte boahtte čavčča juo leat lasi gelbbolaš sámi tulkka.
– Jos mun galggan leat várrugas, de sáhttá kánske lohkat juobe njeallje. Sávaldat lea goit gaskal gávcci ja logi eanet dulkka go dál leat. Muhto ferte vuos oaidnit ahte eat go son boađe dan 20 lohkui álggos, lohká son.
15 jagis dohkkehedje 12 sámi tulkka
Lea dovddus ášši ahte Norggas váilot sámi tulkkat.
Sámi ásahusat ja ovttaskas sámit leat dán cuiggodan guhkká.
2007 rájes 2022 rádjai leat tulkaoahpahusas Oslos dohkkehan badjelaš 2000 gelbbolaš tulkka Norggas.
Dušše 12:is dáin leat sámi tulkkat.
Daid sáhtát oaidnit dan nu gohčoduvvon nationála tulkaregistaris (tolkeregisteret.no). Sii geat leat dien listtus leat man nu dásis almmolaččat dohkkehuvvon tulkan.
– Eat leat ádden dan dárbbu
Searvadahttin- ja girjáivuođadirektoráhtas dat lea bajimuš ovddasvástádus tulkonbálvalussii Norggas.
Go jearrat sis manne ná unnán sámi tulkkat leat dohkkehuvvon, de eai dieđe dása vástádusa.
– Min maid vuorjašuhttá go eai leat doarvái gelbbolaš sámi tulkkat, lohká direktoráhtta dulkon ossodaga jođiheaddji Hanne Løfsnes.
Sáhttet leat máŋga čilgehusa dása go ná moadde sápmelačča leat váldán oahpu, lohká son.
– Váilevaš beroštupmi dán ohppui sáhttá leat vejolaš čilgehus dása, muhto sáhttá maid leat nu ahte mii eat leat ollásit ádden man stuorra dárbu livčče sámi tulkkaide, lohká son.
– Ovttasbargu buktá bohtosiid
Løfsnes sávvá ahte dál go Sámi allaskuvlii sirdo oahpahus, ahte eanet sámit váldet tulkaoahpu.
– Mun jáhkán ahte dat ovttasbargu maid Sámi allaskuvla dál lea álggahan OsloMet`ain buktá buoret bohtosiid. Dál jáhkán leat doaivva lasihit sámi tulkkaid logu, lohká son.
Norggas leat dieđusge eanet go dušše diet 12 sámi tulkka, geat leat almmolaš registaris. Sii tulkojit gielddain ja olu eará ásahusain.
Ođđa láhka geatnegahttá virggálaš duođaštusaid tulkaoahpus (lovdata.no).
Sii geat ain áigot tulkot almmolaš ásahusaid ovddas, fertejit čađahit geahččalemiid vai ožžot duođaštusaid.
- Loga maid dárogillii:
Golmma sámegillii
Joret Mihkkal Bals Sámi allaskuvllas maid sávvá ahte sámit miehtá Norgga nannejit sin tulkongelbbolašvuođa.
– Ambišuvnna lea ahte galgat visot golmma sámegillii fállat dan kurssa dál giđđat, muhto dan ferte dieđusge vuos oaidnit lihkostuvvá go, lohká son.
Go iskkadeame leat čađahan, de fállojuvvo tulkkaide maid ges nubbi oassi dan almmolaš oahpus Oslos.
– Nubbi kursa lea ges vuos OsloMet bokte. De ožžot dan autoriserema, nu ahte dat almmolaš institušuvnnat besset ain geavahit lágalaččat daid dulkkaid, lohká Bals.