Váilot sámegiel dulkkat
Sámi buohccit geat leat Universitehta buohcciviesus Romssas, fertejit geavahit oapmahaččaid dulkan. Noricom fitnodat dat doaimmaha UNN dulkonbálvalusa, ja sii dadjet váttisin gávdnat sámegielat dulkkaid. Maret Laila Anti galggai dán vahkus mieđuštit buohcci, muhto son gárttai maiddái leat dulkan. Dákkár čoavddus lea su mielas dohkkemeahttun. UNN buohcciviessu čállá e-poasttas NRK:i ahte sii eai leat ožžon makkár ge dieđu Noricom fitnodagas ahte eai sáhte doaimmahit sámegiel dulkoma, muhto šállošit goitge go nu dáhpáhuvvá.