- Les på norsk: Slik ble Ella Marie en sangstjerne
2018 čavčča šaddá Ella Márja Hætta Isaksen dovddusin olles riikkas go vuoitá Stjernekamp-gilvvu NRK:s.
NRK Urbi lea humadan olbmuiguin, geat dovdet Ella Márjjá bures, suokkardallan dihte manne son lihkostuvai artistan ja oaččui tv-gehččiid njuorrasit go juoiggai «Máze» NRK:s.
Čeahpes neavttár
Nuorra nieiddažin lei Ella Márjá viššal neavttašit. Su nubbi ruoktu mánnávuođas lei Deanu kulturskuvla, gos son lei gaskamearalaččat golmma geardde juohke vahku.
Su ovddeš kulturskuvlla oahpaheaddji, Ebba Joks, muitá bures Ella Márjjá beroštumi teáhterbargui.
– Sus lei buolli beroštupmi neavttašit, dalle juo go lei 6-jahkásaš. Son bijai olu áiggi oahppat movt galgá láhttet lávddis; sihke gielalaččat, rumašlaččat, rievttes gárvvuid gávdnat rollaide ja dramaturgiija ráhkadit miellagiddevažžan.
Teáhteris ii lean lávlun guovddážis.
– Deanu kulturskuvllas mii eat bargan nu olu Ella Márjjá lávlumiin. Midjiide lei neavttašeapmi ja lávdedáidda deháleamos. Muhto mii dieđusge diđiimet su lávlunčehppodaga birra, ja danne geahččaleimmet nu dávjá go vejolaš bidjat lávluma iežamet bihtáide, muittaša Joks.
Vállje musihka eallingeaidnun
Ella Márjá guođđá ruovttubáikkis Deanu ja fárre Áltái vázzit joatkkaskuvlla, musihkka-, dánsun- ja drámásuorggi. Doppe son čálligoahtá šuoŋaid, ja nu sus loktana beroštupmi musihkkii.
– Go son álggii joatkkaskuvlii, de Ella Márjá mearridii vuoruhit lávluma ja šaddat artistan, muitala su eadni, Britt Elin Hætta Isaksen.
2016:s vuoitá Ella Márjá šuoŋain «Luoddaearru» Sámi Grand Prixa. Jagi maŋŋel vuoitá ges Liet lávlungilvvu, mii lea unnitgielaid gilvu.
Go vuoitá Sámi Grand Prixa, de son dahká mearrádusa mii hábme su musihkkaeallima viidáseappot.
«Maŋŋel Grand Prixa lei mu musihkkabálggis dego mearriduvvon. Mun galgen ráhkadit world-music šuoŋaid, čuovvut seamma njuolggadusaid go sámi artisttat. Muhto mus lei dakkár dovdu ahte in hálit dan dahkat. Mun mearridin vuordit dassážii go gávnnan soapmása, geainna duođai háliidan ovttasbargat.» Dan muitalii Ella Márjá go lei guossin Lindmo-prográmmas njukčamánus 2019:s.
2017:s álggahuvvo ISÁK joavku, mas Ella Márjá lea lávlu. Ja son oažžu Norgga dovddus musihkkáriid Daniel Eriksena ja Aleksander Kostopoulusa mielde ISÁK-jovkui.
- Loga nai: Dette er vinneren av NRK Urbi
Jierpmálaš mearrádus
Livččii go Ella Márjá vuoitit Stjernekamp jus livččii bisson Sámis ja ovttasbargan sámi musihkkáriiguin ja buvttadeddjiiguin?
Dasa vástida Jarle Savio, guhte bargá musihkka-ráđđeaddin Longyear United fitnodagas. Son gal rámida Ella Márjjá mearrádusa.
– Ella Márjá gal lei sáhttit vuoitit Stjernekamp-gilvvu vaikko vel livččiige bisson sámi musihkkabirrasis. Son han lea hui čeahpes musihkkár. Muhto jáhkán gal ahte lei jierpmálaš dahku sus go válljii iežas geainnu, ja dainna lágiin garvvii dan world-music «gilkora» man sámi artisttat dávjá ožžot, dadjá Savio.
Son maiddái rámida ISÁK-joavkku musihka.
– ISÁK-joavkkus lea hui čielga vuohki movt ráhkada musihka ja šuoŋaid. Ii leat nu ahte sii ráhkadit sámi šuoŋaid, muhto sámevuohta dahje sámi elemeanttat laktašuvvet hui lunddolaččat sin šuoŋaide.
ISÁK oažžu šiehtadusa
Ella Márjá ja su joavku ii lean guhká čuojahan ovttas ovdalgo olahedje šiehtadusa skearrofitnodagain, namalassii Little Big Sister -fitnodagain. Dat dáhpáhuvai 2018 čakčageasi, ovdalgo Ella Márjá searvá Stjernekamp-gilvui.
– Mii eat diehtán ahte Ella Márjá lea searvame Stjernekamp-gilvui. Muhto min mielas lei ISÁK-joavku earenoamáš dan dáfus ahte sin musihkka lei nu ođas ja šuoŋain lei alla dássi, muitala Little Big Sister -fitnodaga manager Guttorm Raa.
Sii ledje nu rámis go de oidne Ella Márjjá Stjernekampas.
– Go oinniimet man čeahppi son lea, ja movt son olahii gehččiid váimmuid juohke programmas, de mii duođai easka ipmirdeimmet makkár árvu Ella Márjjás lea.
Little Big Sister ovddasta dovddus artisttaid nugo Karpe Diem, Cezinando, Emilie Nicolas ja Gabrielle.
Guorastit Ella Márjjá luottaid
Ferte go sámi artista dán áigge bargat seamma ládje go Ella Márjá, jus háliida lihkostuvvat ja olahit olggobeallái Sámi?
Jarle Savio vástida ná:
– Artisttaide lea dearvvašlaš ohcalit musihkkabirrasiidda, maid eai dovdda ovdalaččas. Oaidnit sáhttá go ráhkadit musihka eará ládje go dan masa leat hárjánan.
Vegard Bjørsmo, guhte šattai njealjádin Stjernekamp-gilvvus gieskat, lea bargan seamma ládje go Ella Márjá. Son maid guđii Sámi ja fárrii Osloi, ja nu šattai dovddus artistan.
Makkár sámi artista son boahtte jagi beassá Stjernekamp-gilvui? Lea go sus maid čujuhus Oslos...?