Oaivvildit ráđđehus ferte bissehit bieggafápmofitnodaga
Máŋga Stuorradikki bellodaga oaivvildit ahte ráđđehus ferte bissehit olgoriikka bieggafápmofitnodaga, mii áiggošii Mátta-Fovsii cegget bieggaturbiinnaid.
Sveicca Fu-Gen, mii eaiggáduššá Nordic Wind, lea dat mii háliidivččii dál Åarjel-Fovsen sïjte guohtuneatnamiidda.
– Hukset ođđa bieggafámu dan botta go boazosámit vurdet masson eatnamiid buhtaduvvot eará eatnamiin ii oro mangeláhkai heivemin, dadjá Rukses bellodaga Sofie Marhaug, guhte lea nubbijođiheaddjin Stuorradikki energiija- ja luonddulávdegottis.
Dát dáhpáhuvvá oktanaga stáhta bargguin ahte gávdnat lassi guohtuneatnamiid dán orohahkii. Dát guohtuneatnamat galget geavahuvvot dassážii go Storheia bieggaturbiinnat ja dohko ráhkaduvvon geainnut jávkaduvvojit go konsešuvdnaáigodat nohká.
Álgoálggus lei guovtti fitnodagas áigumuš Fovsii hukset, muhto mannan vahkus čielggai ahte nubbi fitnodat, Aneo, geassáda.
– Mii vuordit ahte Nordic Wind dahká seamma mearrádusa, dadjá Guovddášbellodaga stuorradiggeáirras ja energiija- ja luonddu lávdegotti lahttu, Lars Haltbrekken.
Rukses-bellodat ja Guovddášbellodat oaivvildeaba ahte energiijaministtar Terje Aasland (Bb) galgá gieđahallat dán dili, mii dál lea čuožžilan.