Deavdá 120 jagi – dál áiggošii hásttuhit nuorra lohkiid

Boarráseamos sámi bláđđi Nuorttanaste deavdá borgemánu 1. beaivve dán jagi 120 jagi. Kristtalaš bláđis leat fásta lohkit, muhto olusat sis leat boarásmuvvamin.

– Ollu diŋgojeaddjit leat riegádan 1920-1930 ja ollugat vádjolit dál. Ja de lea hástalus oažžut ođđa lohkkiid, ja danne galggašeimmet olahit eanet nuoraid, dadjá Nuorttanaste doaimmaheaddji Ann Solveig Nystad.

Bláđis leat gaskkal 500 ja 1000 olbmo geat dollet bláđii. Ja ulbmil livčče lasihit lohkkiid logu, erenoamážit nuorat lohkiid searvvis.

Ovllá lea gullan muhto ii lohkan

NRK Sápmi deaivvai 18-jahkásaš Ovllá Revheim Østby. Son lea gullan Nuorttanaste birra, muhto ii loga iežas lohkat dan.

– Mun jáhkkán Nuorttanaste fertešii sosiála mediain oidnot. Sihke Facebookas, Instagramas ja Snapchatas, dadjá Østby.

Dál leage bláđđi bargagoahtán olahit nuorra lohkiid. Moatti jagi áigi álmmuhii Nuorttanaste sierra neahttasiiddu.

Nuorra doaibmi beaivválaš jođiheaddjis Ammon Piera Nystadas (25) leat plánat.

– Mun lean hui olu dan birra smiehttan, ja dieđusge eai leat nu ollu nuorra lohkit. Danne soaitá leat gelddolaš nuoraide ahte lea nuorra beaivválaš jođiheaddji guhte diehtá maid nuorat hálidit, dadjá Ammon Piera Nystad.

Erenoamážit ávvujagi oktavuođas navdá son ahte lea dehálaš márkanastit bláđi bures.

– Mii lágidat ávvudoaluid, ja skeaŋkan sihke ođđa ja boares lohkiide lea ahte mii leat vuolidan hatti. Dasa lassin leat ráhkadeamen unna filmma Nuorttanaste historjjá birra, ja dán filmma doaivvun geasuha nuoraid geahčat bláđi historjjá álggaheami rájes.

– Ii dušše kristtalašvuođa birra

Nuorttanaste lea kristtalaš bláđđi. Ovllá Revheim Østby ii daja beroštit religiovnnas.

– Mun in leat religiovnnalaš olmmoš, mu mielas gullá religiovdna ovddeš áigái, dadjá Østby ja ii jáhke dan geažil šaddat ođđa lohki.

Muhto Ammon Piera Nystad deattuha ahte Nuorttanastes lea 60 proseantta kristtalaš sisdoallu, ja danin maid ollu fállat eará lohkkiide.

– Nuorttanaste lea kristtalaš bláđđi, muhto dat ii leat dušše kristtalašvuođa birra. Dat lea maiddái kultuvra ja lea dehálaš giela hárrái, muitala nuorra beaivválaš jođiheaddji.

Son lasiha ahte bláđis leat dološ govvamuittut, mánáid siiddut ja jearahallamat reportáša hámis. Dasa lassin leat olu historjjálaš dieđut bláđis sidjiide geat atnet historjjá dehálažžan.

Ammon Piera Nystad lea doaimmaheaddji bárdni, ja maiddái su áhkku lea bargan Nuorttanastes. Son dadjá iežas bajásšaddan Nuorttanastiin.

Beaivválaš jođiheaddji virgi lea álmmuhuvvon, ja Nystad lea okta dain guhte lea ohcan virgái. Gii dan oažžu mearriduvvo geassemánus.

– Álbmot lea dárbbašan Nuorttanaste

Doaimmaheaddji Ann Solveig Nystad dadjá ahte árbevirolaččat lea nu ahte Nuorttanaste lohkit árbejit bláđi váhnemiin ja áhkuin ja ádjáin.

– Nu ahte nuorat buolvvaid lohkkiid lohku lea lassáneamen, dadjá doaimmaheaddji.

Gažaldahkii mo Nuorttanaste lea ná guhká leamaš doaimmas, vástida Ann Solveig Nystad ná:

– Mun jáhkán dan ahte sihke sámi álbmot ja servvodat lea dárbbašan Nuorttanaste. Vuosttas doaimmaheaddji Gustav Lund čálii ahte Nuorttanaste ulbmil lei olahit buot stobuide, buot vuonaide ja buot duoddariidda.

• Loga maid: Sámi boarraseammos bláđđi šaddá neahttaáviisan

Dát ášši lea ráhkaduvvon ovdal Norgga Journalisttasearvi miellahtut NRK:s manne bargoheaitagii miessemánu 15.b.