– Dás lea oainnat nu, ahte lea hui eaŋkalis siidu. Álki galgá geavaheaddjiide, maiddái boaresolbmuide, čilge Boine.
Nuorttanaste váldodoaimmaheaddji lea rámis go čájeha bláđi ođđa neahttasiiddu beaivvi ovdalgo dat almmolaččat rahppo.
– Mii gávnnaheimmet, ahte mii maid háliideimmet earáid searvái beassat miige čájehit máilbmái ahte mii maid leat eallemin. Vaikko leat 117 jagi boaris dán jagi, de eat leat liikká boaresáigásaččat.
– Nuoraid maid joksat
Nuorttaste almmuhuvvui vuosttaš geardde jagis 1898. Vuosttaš váldodoaimmaheaddji lea Gustav Fridjof Lund, ja Liv Tone Boine lea bláđi gávccát váldodoaimmaheaddji.
(Čálus joatkašuvvá gova vuolábealde)
Son lohká, ahte bábirbláđđi ain galgá leat sin váldobuvtta.
– Bábirbláđi mii eat gal heaitte. Dasa gal lea atnu go báhpáris han lea sierra doaibma. Dat lea dakkár maid sáhtát fievrridit, nahkehit veskui, váldit mielde hivssegii ja doppe logadit. Eat mii áiggu dien láhkái bidjat Nuorttanaste neahttasiiddu, ahte mis ii leat šat dat bláđđi. Mii bidjat osiid goitge neahttasiidui.
Stuorra oassi bláđi dálá lohkkiin leat eallilan olbmot, muhto dál doivot eambbo nuoraid joksat vuoiŋŋalaš ságaideasetguin.
– Nuorat leat hui sáhkkii, ja dát boahtá okta vel sámegiel fálaldat. Nuorttanástes lea iešalddis nuoraid- ja mánáidsiidu. Nu ahte Nuorttanaste galggašii fátmmastit buohkaid.)