- Les på norsk:
Dear Sara lea 25-jahkásaš gárasavvonlaš, Sara Kristina Nutti. Son lea dássážii almmuhan golbma lávlaga ja dain leat guokte nammaduvvon dán mánu NRK Urbin.
Nutti almmuhii iežas vuosttaš lávlaga ođđajagimánu 2021.
Son muitala ahte livččiimet gullan su musihka ovdal, jus ii livččii leamaš nu moalkás geainnu alde vázzime.
Riidu Amerihkás
Máŋgasis lea várra leamaš niehkun vuolgit Hollywoodii čállit lávlagiid.
19-jahkásažžan dagai Nutti justa dan.
– Mun bargen musihkkačálliiguin studios ja mii báddiimet musihka, muitala son.
Die livččii leamaš vuosttaš vejolašvuohta almmuhit musihka, muhto nu ii šaddan.
– Badjánii veaháš riidu musihkačálliid gaskii. Danne ii šaddan das mihkkege. In dieđe riekta manin, šuohkiha Sara.
Moalkás geaidnu
Ruovttubáikkis, Gárasavvonis, váccii son musihkkaskuvlla. Go doppe gearggai de spiehkastii áibbas eará guvlui. Son álggii teáhterii.
– Mun ledjen mearridan šaddat neavttárin, muhto nu ii šaddan, čilgesta Sara.
16-jahkásažžan searvvai ges Ruoŧa X-Factor prográmmii. Vaikko ii vuoitán doppe, de dat lihkká buvttii buriid.
– X-factor lei dat mii duođai álggahii mu musihkkakarrieara, muitala Nutti.
Oappážiid gilvu
Sara Kristina Nuttis leat golbma oappá. Buot njealjis leat musihkkaberošteaddjit.
– Min ruovttus gullui álo musihkka. Jogo luohti dahje lávlla, muitala Sara stuoraoabbá, Hanna Nutti. Hanna lea maiddái beakkán artista Sámis.
Nugo oappážagain juo lávege, de lei sudnos maid gaskanas gilvu.
– Moai gilvvohalaime várra dainna ahte goabbá oažžu sogas eanet rámi, bohkosa Hanna.
Ollesolmmožin lea Hanna hui giitevaš go Sara maid šattai artistan.
– Hui somá dál ahte mus lea soamis geainna sáhtán juogadit musihkkavásáhusaid. Veahkkálagaid moai čađahetne visot, muitala Hanna.
Darvánan šiehtadussii
Sara Amerihká-niegus ii šaddan mihkkige. Dál lei fas nubbi váttisvuohta. Son lei darvánan heajos šiehtadussii.
– Mun in beassan bargat Ruoŧas, nu go háliidin dalle, čilge Sara.
Dán šiehtadusas ii beassan eret ovdalgo skábmamánus 2019. Dalle easkka beasai bargat ovttas skearrofitnodagain, mainna dál bargá Stockholmmas.
Vaikko ii mannan nu bures Amerihkás, de muitala ahte dát mátki lea leamaš veahkkin lihkká. Son lea oahppan ja ovdánan olu dieinna mátkkiin.
– Dat lea leamaš dego musihkkaskuvla. Mun lean oahppan makkár musihka háliidan ráhkadit, mun lea oahppan čállit. Mun lean maid buoridan iežan lávluma ja jiena, muitala Dear Sara.
Balus
Go de viimmat beasai Ruoŧas álggahit musihkkabarggu, de ii vuordán gal guhká. Son álggii dakkaviđe bargat.
– Ádjánin jagi čállit buot lávlagiid, ja dál lean beassan almmuhit, muitala Sara ja moddjesta.
Okta dain lávlagiin lea Red Hot Chili Peppers cover, Californication. Dainna šattai miessemánu Urbin.
Dakka maŋŋel go vuohččan gulai Red Hot Chilipeppers -lávlaga, de dovddai son ahte ferte iežas veršuvnna das ráhkadit.
– Muhto mun ledjen hui balus maid. Sis han lea diekkár hardcore čuovvolanjoavku, muitala Sara.
Son lea maŋimuš jahkebeali almmuhan golbma lávlaga ja dál lea vel EP almmuhuvvon, mas leat vel guokte ođđa lávlaga.
- Guldal: