Dear Sara lea miessemánu Urbi
Maiddái dán mánu Urbbi nammadettiin lei garra gilvu. Earret eará gilvaledje Emil Karlsen & Lávre, Northkid, Keiino ja Slincraze. Muhto ii oktage sis vuoitán.
Miessemánu Urbi lea Dear Sara. Dál son šaddá nuppe háve dán mánu Urbin, ja dat lea iešalddes erenoamáš. Ahte dát dáhpáhuvvá guhtta mánu maŋŋel go almmuhii vuosttaš šuoŋa, lea áibbas jáhkkemeahttun.
Mannan háve válljejuvvui «Something You Should Know» dan mánu Urbin. Dál deaivvai gis Red Hot Chilipeppers cover «Californication» Urbi-doaimmahusa váimmuid.
– Erenoamáš jietna, mii duođaid doaibmá. Šadden hui sáhkkii dán niidii. Doaivumis bohtet eambbo lávlagat, čállá Elle Gaup-Johansen.
– Dear Sara fállá čáppa ja erenomáš «Californication» covera. Dát šuokŋa boahtá čuojahuvvot olu mu Spotifyas dán geasi, muitala June Bjørneback.