– Ájnnasamos la oassálasstet!

– Lågevjagij tjadá libá iehtjádij vuosstáj gilpostam, ja aj gasskaniská. Vilá libá juogu dal tjuojggamin, jali viehkamin – aktu, jali aktan.

– Måj lin dal ståhkam sabegij, tjuojggam ja viehkam mánná rájes, ja lijkkuhin labudit ja hárjjidallat. Dat de nav buoragit dåbddu. Jus en la ålggon viehkamin jali vádtsemin, de la juoga mij la boasstot.

Juoga mij fájllu

Juomitja Elen Hætta Kitok ja Berit Hætta Jannok årroba goappátja Jielleváren Svierigin. Ájgij tjadá libá gilpostam. Ja vilá libá gilpostallamin, juogu dal tjuojggamin, jali aj viehkamin.

Valla ij dal agev hieba nav vaj goappátja mañen libá. Muhte rádjáj la dagu juoga mij fájllu jus nubbe ij la mañen.

– Gæhttjalin de aktan hárjjidallat. Edesik akti vahkkuj, dagu juohkka sådnåbiejve. Soajttá aktan lin tjuojggamin aj. Barggo ja nav dahka vaj en besa nav álu aktan hárjjidallat. Valla basijt de gæhttjalin.

Lågå: – Sametinget må ta samisk idrett på alvor

SMajn ballaba

Juomitja guovtes dal åvddålijguovlluj gæhttjaba boahtte Sámegilppusijda (SM), ja jáhkkeba såj libá ájn måttijt jagijt danna oassálasstemin. Valla ballaba SMa gáhtomin la.

– Guhtis diehtá man guhkev danna oassálasstin. Jus lij munnun åvddågåvvå, de ..... Da ham gávnnuhi sij gudi li nav guhkev danna gilpostam. Mujna l gal akta åvddågåvvå, ja dat la Ivar Kuorak. Måj gal galggin oassálasstet SMan sæmmi mælggadav dagu sån, javllá Berit Hætta Jannok tjajma.

Oabbá Elen Hætta Jannok guorras dasi, valla dættot sån gal jáhkká SMa hæjttá åvdås gå såj hiejtteba.

Lågå: Ski-SM: – Dette gleder jeg meg til hvert år

Gássjel ásadiddjijt gávnnat

Elen ja Berit vuojnneba dille SMan la hiehten gå la nav gássjel ásadiddjijt dajda gilppusijda gávnnat.

– Vuojnnet dal jus sjaddá SMa gæssáj. Da la má sæmmi barggo ásadit jus li låges jali tjuodes gudi li mañen. Ájnnasamos le gå bessin oassálasstet, dajna gå sihtin gilppusijt bisodit, javllaba gilposveterána.

Lågå: Arrangerer samemesterskap i forbindelse med Tråante 2017

Ájnnasamos

Ja sunnu miella la divnajn la åvdåsvásstádus oassálasstet nav vaj gilppusa e någå.

– Da li má nav moadda gilppusa ma li dagu "láhppum". Dagu nav ålos gudi e sidá oassálasstet. Le gus dat prestajonsballo, vaj mij la?

– Valla ájnnasamos la mañen liehket, ij vuojttet, ja vájbi dan lahkáj nuorajt arvusmahttet.