Håkon Lykkebø Strand (Frp) er ordførar i Møre og Romsdals største by, Ålesund. Kommunen han er ordførar i har sjølv innført den kommunale delen av Helseplattforma.
Men planane om å innføre dette systemet ved sjukehusa i Møre og Romsdal gjer han svært uroa.
– Konsekvensen av innføringa kan bli lengre ventetider for pasientane, noko som også kan bety auka lidingar og tapt helse, skriv Lykkebø Strand.
- Visste du at sjukehusa må låne hundrevis av ekstra legar og sjukepleiarar når Helseplattforma skal innførast? Det er heilt sant. Les deg opp her.
– Råkar eldre og multisjuke
Ordførar Håkon Lykkebø Strand minner Helse Midt-Noreg om at Helseplattforma langt frå er ferdig og klar til bruk.
– Trass i feilretting og forsøk på å forbetre systemet er ingen av dei fire områda som Statens helsetilsyn har kravd korrigert lukka per fjerde mars 2024, skriv Lykkebø Strand.
Han fryktar at Helseplattforma skal føre til at sjukehusa kjem til å behandle færre pasientar og at problema ved sjukehusa skal forplante seg nedover til kommunehelsetenesta.
– Om spesialisthelsetenesta ikkje har kapasitet til å handtere pasientane vil kommunane i heile fylket kunne få auka press på tenestene, noko som særleg kan råke eldre og multisjuke pasientar, skriv han.
Tilsyn ferdige først etter innføringa
Ordføraren i Ålesund er ikkje åleine om å uroe seg over kvaliteten på Helseplattforma.
Ei rekkje tilsyn og offentlege organ skal granske Helseplattforma. Datatilsynet, Helsetilsynet, Direktoratet for strålevern, Statsforvaltaren, Kripos og Riksrevisjonen skal alle granske forskjellige sider ved dette datasystemet.
Rapportane ligg ikkje på bordet før etter at Helse Møre og Romsdal etter planen tek i bruk systemet.
– Når det er varsla denne typen tilsyn inneber dette at det kan ligge føre brot på lover og forskrifter. Og det er alvorleg om vi seier ja til å innføre eit system før vi fått svaret på dette, sa styremedlem Torgeir Sand Aas under styremøtet i Helse Møre og Romsdal onsdag.
– Forbetringar av systemet om få dagar
Under eit styremøte i Helse Møre og Romsdal onsdag la konstituert direktør i Helseplattforma AS, Siri Berg, fram ei omfattande liste over utbetringar som kjem i ei oppgradering av systemet 11. mars.
Oppgraderinga tek for seg både dokumentasjon og styringsdata, systemet tek opp i seg nokre av krava om at systemet skal bli enklare å bruke, systemet for handtering av legemiddel blir endra og meldingsflyten blir betre.
Helse Møre og Romsdal har konkludert med at oppgraderinga ikkje reduserer risikoen på alle område.
– Vent på risikovurderinga
I byrjinga av april skal Helse Møre og Romsdal gjennomføre ei ny risikovurdering som er knytt til innføringa av Helseplattforma. Føretaket har sett i verk ein prosess for å auke bemanninga, og krev å få tilført 100 legar og 140 sjukepleiarar, i hovudsak frå dei andre sjukehusa i Midt-Noreg.
Målet er å kunne handtere ein risiko som er på raudt nivå.
Ordførar Håkon Lykkebø Strand skriv at han er svært uroa. Han fryktar at helsetenestene skal få vanskar med rekrutteringa og at helsetenestene skal bli svekka.
– Som ordførar i Ålesund bed eg på det sterkaste om at innføringa av Helseplattforma i Helse Møre og Romsdal blir utsett til ny risikovurdering tilseier at dette er forsvarleg, skriv han i brevet til Helse Midt-Noreg.