Ny optimisme ved Vard Aukra

Hopp til innhold

Optimismen er tilbake ved Vard Aukra etter sjøsettinga av nytt eit havbruksfartøy. I løpet av det siste året har dei utvikla ein heilt ny serie fartøy til fiskeri og havbruk, og i dag kunne dei sjøsette den aller første forflåten.

Ifølge direktør ved Vard Aukra Hans Gunnar Hansen, er sjøsettinga starten på ein ny epoke ved verftet.

– Det er ein veldig stor milepæl for oss. Vi byrja å jobbe opp imot denne marknaden i fjor og no skal vi levere eit heilt nytt fartøy, seier han.

Les også: Tøff konkurranse om vedlikehaldsoppdrag

Dugnad

Krisa i offshorebransjen har ført til oppseiingar og permitteringar ved fleire reiarlag. Hansen trur omstillinga vil få stor betydning.

– Vi merkar at det er mange som er uroa for korleis det går med verftet når vi er ute og snakkar med ulike folk. Fleire har merka at det er lågare aktivitet ved verfta enn det normalt har vore før, seier Hansen.

Han fortel at omstillinga har vore ein dugnad med fleire involverte partar.

– Med hjelp frå blant anna Aukra næringsforum har vi no klart å få ein oppsving, seier Hansen.

Les også: – Slipper å si opp arbeidere

Ser framover

Vard konsernet vil at avdelinga i Aukra, som tidlegare bygde mellom anna supplyfartøy, no skal konsentrerer seg om å bygge fartøy retta mot fiskeri og havbruk.

Den nye serien av fartøy har blitt utvikla i samarbeid med oppdrett- og fiskerinæringa. No skjer det nyutvikling for kvart fartøy dei bygg.

– Vi kan bruke mykje av den kunnskapen vi har frå offshorebransjen, samtidig som vi får mange nye impulsar og lærer ting vi kanskje ikkje hadde tenkt på før, seier Hansen.

– Det er ein fantastisk giv på verftet og folk synest det er spennande. Det er morosamt og heilt nytt for alle, held han fram.

Også dei tilsette ved Vard Aukra er fornøgd med omstillinga.

– Ja, vi håpar det blir ein suksess og at det vil gi mykje jobb framover. Det er det viktigaste, seier Kåre Eivind Solem, røyrleggar ved Vard Aukra.