Fleire vil ha kjøttfri mat

Janne Moe serverer nysteikte burgarar med salat, dressing og ananasskiver. Den unge kvinna frå Ørsta bestemte seg for å prøve eit vegansk kosthald for snart tre år sidan, eit val ho aldri har angra på.

– Eg har fått meir energi, tenker raskare, held ut mykje lenger om dagane og har færre humørsvingingar. Eg har rett og slett fått betre kontroll på både kropp og sinn.

• Vegetarianer? Slik gjør du det

Ein trend i marknaden

Moe er dagleg leiar for Sunkost Volda. Ho har alltid vore interessert i helse og kosthald, men det var oppdaginga av plantebasert mat og iveren etter å dele erfaringane sine med andre, som gjorde at ho for to år sidan opna sin eigen helsekostbutikk.

– Folk i alle aldrar kjem innom og spør etter vegan- og vegetarprodukt, og det blir ofte tomt i hyllene.

Den aukande interessa for plantekost kan målast nasjonalt. Annakvart år undersøker IPSOS norske matvanar. Dei stiller spørsmålet; "Kor interessert er du i vegetarmat?".

– Etter siste måling har interessa stege kraftig, spesielt blant kvinner, seier John Spilling i IPSOS.

"Norske spisefakta 2016" viser at prosentdelen har gått opp frå 16 til 21.

– Dette er ei betrakteleg auke på berre to år. I Sverige er det enorm interesse for vegetarmat, så dette kan vere noko vi tek derifrå.

• Butikkene kaster seg på den grønne bølgen

Også dei store matvarekjedene merkar interessa for vegetarmat. I slutten av juni lanserte Coop Norge to nye vegetarburgarar.

– Etter få veker er salet av vegetarburgarar dobbelt så stort som salet på vanlege tradisjonelle burgarar av storfe, seier kommunikasjonssjef i Coop Norge, Harald Kristiansen.

Lettare tilgjengeleg

På Thorbjørnsen i Norsk Vegetarforeining seier dei i år har fått langt fleire spørsmål om vegetarkosthald enn tidlegare.

– Det er over dobbelt så mange som tek kontakt for å lære meir om korleis ein et sunn plantebasert mat.

– Kva er grunnen til det?

– Mange tenker intuitivt at vegetarmat er sunt og spennande. Tidlegare var det vanskeleg i praksis, men no er det oppskrifter tilgjengeleg overalt og det har kome fleire produkt i butikkane.

Lege Tanja Kalchenko fortel om ei rekke helsefordelar ved å kutte ned på kjøttmengda.

– Eit vegetarisk kosthald kan førebyggje livsstilssjukdommar som overvekt, hjarteinfarkt, diabetes type 2 og nokre typar kreft.

I følgje Verdsorganisasjonen for helse er tilarbeida kjøtt som pølser, kjøttpålegg og kjøttdeig, kreftframkallande.

• Verdens Helseorganisasjon: Å spise pølser er kreftfremkallende

– Halvparten av kjøttet nordmenn et, er kreftframkallande. Det er difor sunnare å unngå kjøtt, meiner legen.

Enkelte er redde for å få vitamin- og proteinmangel av kjøttfri mat, men med B12 og omega-3 er ein trygg. Ein kan også ta tilskot av jod og D-vitamin.

Janne Moe syns ikkje det er vanskeleg å leve utan kjøtt.

– Eg et vanleg mat slik som alle andre. Dei fleste et salat og grønsaker utan å tenke over at det er plantebasert. Det er mykje godt ein kan lage utan kjøtt, og det finst også mange kjøtterstatingar i butikken.