49 år gamle Janice Karina Buen frå Skien døydde tysdag på Skien sjukehus av skadane ho blei påført i ulykka kvelden den 3. juni i Ålesund. Det skriv Møre og Romsdal politidistrikt i ei pressemelding.
Kvinna har lege innlagt på sjukehus sidan ulykka. Ho blei først frakta til St. Olavs hospital i Trondheim, men seinare flytta til Skien.
Politiadvokat Jan Roar Gidske seier at namnet er frigitt i samråd med dei pårørande
Foto: Politi_EATPolitiadvokat Jan Roar Gidske seier kvinna sovna inn på sjukehuset og at namnet er frigitt i samråd med dei pårørande.
Det tredje dødsofferet etter trafikkulykka blir obdusert.
– Det må vere av interesse for politiet å avdekke om skadane er påreknelege med et som skjedde, seier han.
Var på veg heim frå sommarshow
49 år gamle Buen sat i bilen saman med to venninner då ein møtande bil kom over i motsett køyrefelt inne i Blindheimstunnelen på E39 i Ålesund.
Tunnelen ligg om lag ei mil unna Ålesund sentrum, like ved kjøpesenteret Moa. Det er to køyrefelt i tunnelen. Tunnelen måtte stengast i fleire timar etter at dei to bilane hadde kollidert.
Dei tre kvinnene var på veg heim frå eit sommarshow på Teaterfabrikken i Ålesund då ulykka skjedde.
Dei to andre i bilen blei erklært omkomne kort tid etter ulykka. Dei var 51 og 47 år gamle og budde i Ålesund.
Sikta etter ulykka
Den 24 år gamle kvinna som køyrde den andre bilen er tidlegare sikta etter ulykka.
Ho er sikta for å ha vore aktlaus i trafikken og har fått førarkortet beslaglagd.
Så langt har politiet sagt at det ikkje har vore aktuelt å sikte nokon av dei andre som sat i den same bilen. Det var totalt fire personar i 20-åra i denne bilen. Desse blei lettare til moderat skadd i ulykka.
Håper «svart boks» kan gi svar
Politiet har også gjort beslag i saka, blant anna mobiltelefonen til den sikta kvinna.
Politiadvokat Magne Kvalvik seier dei håper den «svarte boksa» i bilane kan gi svar.
Foto: Øyvind Sandnes / NRKOgså bilane blir undersøkt som ein del av etterforskinga. Politiet håper at den «svarte boksa» i bilen kan gi svar på årsaka til ulykka.
– I nyare bilar er det ofte verdifull informasjon ein kan hente ut. Vi håper at det kan gi viktige svar om forløpet til ulykka, har politiadvokat Magne Kvalvik i Møre og Romsdal politidistrikt tidlegare uttalt til NRK.
