Sjå skadane etter den kraftige vinden

Den siste veka har det vore nok av innevêr i Midt-Noreg. Ekstremvêret «Gyda» kom med mykje regn, og la delar av Surnadal under vatn.

Og ikkje før «Gyda» hadde reist sin veg kom nye farevarsel, denne gongen for vind. På det meste var det målt vindkast på 45,3 meter i sekundet på Veiholmen på Nordmøre.

Alf Egil Olsen bur passande nok på Været, heilt ute i havgapet på Veiholmen. Han er ikkje framand for sterk vind.

– Eg har jo senga mi på vêrveggen. Vi kjenner jo at veggen bevegar seg. Vi ligg og gynger i senga, ler Olsen.

40 hus vart skada

Olsen er vaktmeister for ein del av feriehusa på øya der han bur. Då det lysna i dag talde han 40 bygningar som hadde fått merka orkanen.

Skadane varierer frå to-tre taksteinar som er flekka lause, til knuste vindauge og halve tak som er øydelagde.

– Ein som har ein bestefar her ute som er snekker, siterte han på at det er enkelte som gløymer at dei legg tak på Veiholmen.

Les også:

Mykje skadar etter «Gyda»

Etter ekstremvêret «Gyda» som herja tidlegare førre veke, renn det framleis inn med skademeldingar.

Tal frå Finans Noreg og Norsk Naturskadepool viser at det hittil er meldt om rundt 2000 skader. Forsikringsselskapet Gjensidige har anslått at vêret vil ende opp med å koste mange millionar kroner.

– Eit foreløpig anslag for kostnader, og det gjeld alle forsikringsselskapa i bransjen, er at dei etter kvart vil passere 100 millionar kroner, seier kommunikasjonssjef Line Marcelius.

Har vore heldige

Olsen fortel at på eit bygg ute på moloen bles det hol i veggen under uvêret søndag. Sjølv miste Olsen «berre» nokre meter med takrenner.

– Vi har snakka saman vi som bur der ute, og vi seier at vi har vore heldige. Ein del av gamlekarane her er godt vane med vêr, og dei seier vi skal vere takknemlege.