Fleire tidlegare medarbeidarar har skulda TV4-profilen for sexistiske, rasistiske og homofobe kommentarar. I tillegg er han skulda for seksuelle overgrep. Dei meiner også at leiinga i TV4 aktivt har dyssa ned skuldingane, og at dei har visst om skuldingane i fleire år, skriv Aftonbladet.
Skuldingane mot Timell kjem etter at fleire kvinner har gått ut på sosiale medium i samband med #Metoo-kampanjen og fortalt at dei har vore utsette for overgrep og trakassering av programleiaren, som i har leia fleire populære program for TV4.
Samanlikna med Weinstein
Ein av dei som har gått ut mot Timell er Lulu Carter, som har medverka som ekspert i oppussingsprogrammet «Äntligen hemma». Ho seier til Expressen at ho måtte gå i terapi på grunn av det ho opplevde.
Tidlegare i veka la ho også ut eit bilde på Instagram der ho samanlikna Martin Timell med Harvey Weinstein.
No har TV4 bestemt seg for å ta programma Timell skulle ha leia denne hausten av sendeskjemaet. Det gjeld «Äntligen hemma», som er eitt av dei mest populære programma på kanalen, og programmet «Fuskbyggarna».
Ekstern etterforsking
Advokatfirmaet Zetterwalls skal no gjennomføre ei gransking for å finne ut av kva som har skjedd.
– Oppdraget er å undersøke situasjonen hos oss og miljø der medarbeidarane våre arbeider, og deretter foreslå eventuelle endringar vi må gjennomføre, skriv TV4 i ei pressemelding
- Les:
- Les:
I tillegg vil TV4 innføre nye retningslinjer for samarbeid med produksjonsselskap. Dei ønsker også å få med seg tv-husa SVT, MTG og Discovery for å diskutere korleis bransjen skal bli betre på å møte spørsmål og skuldingar om misforhold, diskriminering og trakassering, skriv Expressen.
TV6 fjernar også Timell
I Noreg er det TV6 som viser «Äntligen hemma» med den norske tittelen «Endelig hjemme». Og no blir programmet fjerna frå den norske sendeplanen også, seier kommunikasjonssjef Line Vee Hanum i MTG TV.
– Når det har kome så kraftige skuldingar mot programleiaren at TV4 har valt å ta programmet av sendeplanen, meiner vi det er rett at vi også gjer det, seier ho til NRK.
I tillegg til at programmet blir fjerna frå sendeplanen søndag, har MTG også fjerna tidlegare sende program frå nettspelaren sin Viafree.
