Tre CNN-journalistar går av etter Russland-artikkel

CNN har akseptert oppseiinga til tre journalistar etter at dei publiserte ein artikkel om eit angiveleg møte mellom ein av president Trump sine rådgjevarar og ein russisk finansmann, skriv nyheitsbyrået AP.

Dei tre journalistane som nå har levert si oppseiing var Thomas Frank, som skreiv artikkelen, Eric Lichtblau, ein redaktør i CNN si graveavdeling og Lex Haris, som overvaka avdelinga. Det opplyser ein CNN-medarbeidar som ønskjer å vere anonym.

Artikkelen som blei publisert torsdag handla om ein mistanke om eit møte mellom eit russisk investeringsfond og ein assistent til president Donald Trump. CNN skreiv at senatets etterretningskomité etterforska dette møtet.

Ei intern gransking i CNN avslørte at visse redaksjonelle retningslinjer ikkje var følgt då artikkelen blei publisert.

Då artikkelen blei sletta frå nyheitsnettstaden fredag kveld blei den erstatta med ei redaksjonell orsaking retta til Anthony Scaramucci, den nemnde rådgjevaren til Trump.

Journalist i CNN og tidlegare Pulitzer-finalist Thomas Frank la laurdag ut ei twitter-melding med den redaksjonelle orsakinga frå CNN.

Eit slag i ansiktet for CNN

President Trump har vore kritisk til CNN, og kalla nyheitskanalen «falske nyheiter». Han nekta blant anna å svare på spørsmål frå ein CNN-journalist under sin første formelle pressekonferansen etter presidentvalet.

Sist vekes CNN- tabbe og dei påfølgande oppsigelsane går ikkje upåakta hen på Trump sin Twitter-konto.

LES YTRING: Da Trump møtte pressen

Trump sin rådgjevar, Scaramucci har ei meir ydmyk tone på twitter og aksepterer orsakinga frå CNN.