– Eg har byrja å analysere allereie eg, seier detektiv Nicolay Ramm i NRKs Maskorama-podkast.
Etter fjorårets suksess er det mange som er spente på årets sesong av Maskorama som startar 6. november.
Det er eit program det osar mystikk av.
For også denne gongen skal åtte kjendisar kle seg opp i kvart sitt kostyme og villeie det norske folk med song og dans på laurdagskveldane.
Deltakarane må halde korta tett til brystet. Dei må lyge til venar og familie.
Dei må gjere taktiske val for å unngå å bli tatt av paparazzi-fotografar som kanskje har fått eit tips eller to.
Ingen veit kven som skjuler seg bak maskene bortsett frå eit knippe høgtståande folk i produksjonen.
– Skikkeleg gåsehud
Men no har fyrste avsløring kome for dagen.
I årets sesong skal vi bli betre kjent med ein nisse og ei havfrue.
Avsløringa kjem i fyrste episode av NRKs Maskorama-podkast der programleiar Sarah Natasha Melbye har besøk av detektivane Nicolay Ramm, Marion Ravn og Jan Thomas.
For plutseleg bankar det på døra og panelet får to konvoluttar der det står følgjande:
«God ljug, hilsen Nissen» og «Haha, jeg gleder meg til å forvirre dere. Havfruen».
– Shit, nå fekk eg skikkeleg gåsehud, reagerer Marion Ravn etter at hinta er opplesne.
Detektivane byrjar med ein gong å spekulere i kven det kan vere, og viss du er nysgjerrig på kven Jan Thomas trur havfruen er kan du høyre det her.
– Mange som er like ko-ko som meg
Kven er det som skjuler seg bak maskene? Gjennom heile hausten kan du vere med Sarah Natasha Melbye og gjestane hennar i å spekulere rundt dei nye hinta som kjem.
For i podkasten, som kjem ut kvar torsdag og søndag, vil det kome eksklusivt Maskorama-innhald.
– Eg veit ikkje meir enn det andre veit, men det eg veit er at hinta like gjerne kan dukke opp i podkasten som på TV, seier Melbye.
På søndagane får ho besøk av – og det aller fyrste intervjuet – med den som har roke ut kvelden før.
Melbye gler seg til å dele engasjementet sitt med andre og ha ein dialog med publikum.
– Det er mange som er like ko-ko som meg, og eg gler meg til å dele podkasten med alle som synest Maskorama er kjempegøy.