Sigrid viser norsk design i britiske Vogue

Det var under moteveka Oslo Runway i februar at Vogue gjorde intervju med ei designkledd Sigrid.

Sigrid har gjort braksuksess med songane «Don't kill my vibe» og «Stranger» og har teke Storbritannia med storm.

– Viss du er ung musikar og vil drive med popmusikk, så er det viktig at du gjer det fordi du elskar musikk, seier Sigrid Raabe i videoen som blei publisert i motemagasinet Vogue si nettutgåve i går.

I rekka av artistar Vogue har intervjua i spalta «Vogue meets» finn vi kjente artistar som Emma Watson, Sienna Miller og Dakota Johnson. Og nå altså det norske stjerneskotet Sigrid Solbakk Raabe.

I videoen sit Sigrid ved eit kvitt piano, der ho spelar ein av fjorårets store hittar «Stranger».

– Eg har vore så heldig som har fått vekse opp i Norge, med å gå på turar og på ski. Det var like viktig for familien min som musikken, fortel Sigrid Raabe i videoen.

Tidlegare har det norske superparet, modellen Lea Meyer og Henrik Holm kjent frå Skam blitt intervjua av Vogue.

Berre norsk design

I ei av scenane i videoen der Sigrid dansar i snøen, har ho på seg ei iaugefallande raud jakke.

Det var den amerikanske kjendisstylisten Molly Dickson som styla Sigrid før Vogue-videoen. Dickson har styla ei rekke Netflix-kjendisar og blei flydd inn av arrangørane under Oslo runway i februar.

Til å style Sigrid Raabe brukte Dickson berre norske designarar som FWSS, Fram, Tom Wood ESP og nyetablerte MAUD.

Designar bak MAUD, Sophie Noel Vanay, syns det er kjempestas at den raude jakka ho har designa nå har hamna i britiske Vogue.

– Det var veldig morosamt, vi har venta på resultatet. For eit nystarta merke er det stas at eit av plagga våre ender opp i Vogue, og det er supert å få det på Sigrid, ein norsk artist vi liker, seier Vanay.