Meiningsfylt Oscarfest

I år ville produsentane av Oscar-showet ha meir innhald i takketalane, etter at dei hadde sett seg lei på lange oppramsingar av namnelister frå scenen. Og dei fekk svar på tiltale.

På førehand var det venta mest oppstyr rundt OscarSoWhite-kampanjen. Mange kritiserte juryen for manglande mangfald i dei mest prestisjefylte priskategoriane, og regissør Spike Lee boikotta utdelinga i natt i protest.

Rock sette standarden

Kveldens Oscar-vert, Chris Rock, nytta høvet til å kome med nokre spark allereie i opningsmonologen. Han sa blant anna at han aldri hadde fått jobben som vert om det hadde vore ein jobb ein blei nominert til.

Han spurde også kvifor protestane kom akkurat i år, når det hadde vore minst 70 andre Oscar-utdelingar utan svarte nominerte.

– Det er sjølvsagt fordi vi hadde noko å protestere mot på 50- og 60-talet. Vi var for opptekne av å bli valdtekne og lynsja til å bry oss med kven som vann pris for beste foto.

• Les også: Hvite menn som pusher 70

Og «The Revenant»-regissør Alejandro Gonzalez Inarritu følgde opp då han vann prisen for beste regi:

– Vår generasjon har no ein stor moglegheit til å frigjere oss frå fordommar og tankesett og ein gong for alle gjere hudfarge like irrelevant som lengda på håret vårt.

Klimaendringar

Etter å ha vore nominert seks gonger, fekk Leonardo Di Caprio endeleg Oscar for beste mannlege hovudrolle. Han valde å fokusere på klimaendringane i sin takketale:

– Klimaendringane er ekte. Dei skjer akkurat no. Det er det mest alvorlege trugsmålet mot menneska, og vi må arbeide saman og slutte å utsetje.

Filmen «Spotlight» fekk pris for beste film og beste originalmanus. Filmen handlar om etterforskinga avisa Boston Globe gjorde rundt overgrep mot barn i den katolske kyrkja. I takketalen appellerte produsenten til paven:

– Denne filmen gav ei stemme til dei som overlevde, og denne prisen forsterkar den stemma, som vi håper skal bli eit kor som blir høyrt heile vegen til Vatikanet. Pave Frans, det er på tide å beskytte barna og gjenopprette trua.

Ståande applaus for Lady Gaga

Eit av augneblikka mange snakkar om frå Oscar-showet i natt, var Lady Gaga si framføring av «Till It Happens to You». Sangen er henta frå dokumentaren «The Hunting Ground», som handlar om valdtekter på amerikanske universitet.

• Les også: Taylor Swift med milliondonasjon til Kesha

Gaga blei introdusert av visepresident Joe Biden som heldt ein appell mot seksuell trakassering. Artisten framførte songen sitjande ved eit kvitt piano, og mot slutten kom fleire valdtektsoffer på scenen. Framføringa hausta ståande applaus.