James Bond-filmane er ein av dei mest utbytterike filmseriane gjennom tidene. Og no er bodkrigen for å få gi ut den neste filmen i serien i gang, skriv New York Times.
Det er Sony Motion Pictures som har hatt rettane det siste tiåret. Dei fire filmane dei hadde ansvaret for, spelte inn nesten 30 milliardar kroner på verdsbasis. Men kontrakten med dei to selskapa som eig opphavsretten til serien, MGM og Eon Productions, gjekk ut i 2015.
Gjer seg lekre
Filmprodusentane Barbara Broccoli og Michael G. Wilson i Eon Productions er dei mektigaste i Bond-serien. Dei har siste ord i alt frå filmdialogar, rolleliste til marknadsføring og reklame.
Foto: CARL COURT / AfpFem filmselskap kjempar no om å få kontrakten om å gi ut den neste filmen i serien. I tillegg til Sony, skal storselskapa Warner Bros, Universal Pictures, 20th Centruy Fox og det noko mindre Annapurna vere med i bodkrigen.
Dei har hatt fleire møter med dei som eig opphavsrettane for å gjere seg lekre og presentere korleis dei vil marknadsføre den neste James Bond-filmen. Den neste kontrakten skal gjelde for berre ein film, i motsetning til den førre avtalen som var for fire filmar.
- Les:
- Les:
I samband med produksjonen av «Spectre» skal Sony ha bidrege med om lag halvparten av produksjonskostnadane, som var på over to milliardar kroner, men fekk berre ein fjerdepart av overskotet tilbake.
Men sjølv om ein prosentvis bidreg med meir enn ein får tilbake, er James Bond rekna som ei rimeleg sikker investering. Alle filmane i serien har spelt inn langt meir enn det har kosta å lage dei.
Uavklart rolleliste
Daniel Craig har spelt James Bond i fire filmar så langt, og har sagt han er ferdig med rolla. Men produsentane håper å få han med ein femte gong.
Foto: Rebecca Blackwell / ApRollelista skal ikkje ha vore eit samtaletema i forhandlingane, ifølge New York Times. Men Daniel Craig har tidlegare sagt at han er ferdig med rolla. Han skal ha fått eit svært godt tilbod for å spele Bond i ein film til. Og meldingar frå tidlegare denne månaden, kan tyde på at han er på gli.
Craig har hatt rolla som agent «007» i over 4000 dagar. Det er nest lengst. Berre Sir Roger Moore har hatt rolla lenger. Han var Bond i 5118 dagar. Men skulle Craig likevel takke nei, er lista over moglege erstattarar lang. Mange har teke til orde for å fornye Bond-figuren. Blant forslaga er å gi agenten afrikansk eller asiatisk opphav, eller gjere han om til kvinne.
