Beyoncé stal pauseshowet under Super Bowl

Meisterskapsfinalen i amerikansk fotball, Super Bowl, er eitt av dei store tv-høgdepunkta i USA. I fjor såg over 110 millionar amerikanarar finalen.

Men for mange er pauseunderhaldninga eit vel så stort trekkplaster som sporten. Som oftast er det ein minikonsert med nokre av dei største stjernene i verda.

• Medier, pupper og politikk

– Super Bowl er til for Beyoncé

I år var det Coldplay, Bruno Mars og Beyoncé som var plukka ut. Men det var sistnemnde som stal showet. Ho brukte pausen til å framføre den nye singelen «Formation» som ho slapp laurdag.

New York Times skriv at ho er den einaste artisten som kan bruke Super Bowl til å presentere nytt materiale.

– Super Bowl er kanskje den største scenen i landet. Ho annonserte også ein ny verdsturne under framføringa. Ved å gjere dette seier ho eigentleg at pauseshowet er til for henne og ikkje omvendt.

Coldplay får gjennomgå

Det var Coldplay som skulle vere hovudartisten i pausen. Men dei var ifølge New York Times grå og kjedelege, og fungerte mest som eit backingband.

Også i Vanity Fair får den britiske popgruppa gjennomgå.

– Frontfigur Chris Martin har på seg eit antrekk som ser ut som om har vore med i ein paintballkamp. Og du merkar at publikum er rastlause fordi dei veit at ein annan artist (Beyoncé) ventar i kulissane.

Magasinet Rolling Stone er derimot litt meir venleg innstilt overfor Coldplay. Dei skriv at bandet leverte eit godt show, godt hjelpte av Beyoncé og Bruno Mars.

– Coldplay gjorde det dei kan best – leverte ein oppløftande stadionkonsert.

Ekskona til Chris Martin, Gwyneth Paltrow, var også til stades på stadion. Ho var på kampen saman med dottera Apple. På sosiale medium publiserte Paltrow eit bilde av Apple saman med dottera til Beyoncé og Jay-Z, Ivy Blue, teke bak scenen:

Blant artistane som har vore med i pauseshowet tidlegare finn vi Prince, Madonna, Bruce Springsteen og Whitney Houston.