Taket først, deretter innhaldet

På operataket skin sola og forholda er gode for eit sjølvportrett. Spanske Claudia Medina tar ein selfie på marmortaket. Familien hennar hadde ein dag i Oslo, og hadde lyst å sjå bygningen.

– Me kjem nok ikkje til å gå inn, for me har ikkje tid, seier ho.

Dei er ikkje aleine om det. Høyrer du med ein nordmann kan ei typisk frase vere: «Eg har aldri vore i Operaen, berre på taket».

Fleire tusen deler

Over 300 000 folk går på førestilling i operaen kvart år, men mykje tyder på at mange berre er innom taket.

På Instagram finst det mange titals tusen bilete med emneknaggar som #dennorskeoperaogballett, #dennorskeopera, #operataket eller #Oslooperahouse.

Operaen sjølv har tal på at over 10 millionar menneske har gått over operabrua sidan opninga.

Kanskje ikkje så rart? Noreg solar seg i glansen som av ein av 52 stader du må reise til i 2018, ifølge New York Times, og når Lonely Planet listar opp operaen som ein attraksjon, så vil jo folk dit.

Og operataket blir ofte lista opp som ein av topp ti ting du må sjå eller gjere i Oslo.

NSB dristar seg til og med frampå med denne formuleringa:

«Mange velger å ta en spasertur på Opera-taket, og gjerne en «selfie» også. Og har du lyst på en kulturopplevelse settes det opp flere stykker i Operaen gjennom året.»

Taket først, deretter innhaldet.

– Vil etterlikne

Jill Walker er professor i digital kultur ved Universitetet i Bergen, og samanliknar det å ta turistattraksjon-selfiar med folk som tidlegare hasta seg til postkorthylla for å kjøpe eit minne til slekt og vener.

Det at ein kan gå opp på sjølve operataket har gjort bygget tilgjengeleg, og det har blitt populært å ta turen dit. Og ta ein selfie, sjølvsagt.

– Det handlar også om å kanskje skrive seg inn i eit slags ritual. Eg tar det same biletet som veldig mange har tatt. Det er ein måte å vere del av eit fellesskap.

– Eg vil ha likes

På marmortaket er det fullt av solbrillekledde turistar. Selfiestonga er i flittig bruk. Marmor, flott lys, og måker gir gode utgangspunkt for fine bilete.

Det er folk frå heile verda på operataket, og blant dei er Firat Coskun frå Tyrkia. Han ville sjå arkitekturen og den nordiske stilen. Han fortel at han kjenner bygget frå ein ven sin reiseblogg.

Og selfien er viktig for han.

– Når eg tar ein selfie vil eg sjå all bakgrunnen, og overkroppen min, ikkje den nedre delen, for eg er ikkje så høg. Og så er det viktig med bra lys i ansiktet, seier han.

– Og kva er målet med selfiane?

– Eg vil ha likes. Det er det eg vil ha.