Nuorasmuvvá go bivdui beassá

Árrat iđđedis lei son čuoččastan stákkuinis – náhkkegahpir vel oaivvis. Go luossabivdu álgá, de ii bisset gal dálki su mannamis oaggut.

– Nu guhká go duohta olmmoš goastá ja nagoda, de gal dat jo gáibit dan Deanu, geat jo leat hárjánan dan bivdit, dadjá Länsmän.

Vuoras olmmoš, muhto cuotnat mannat

Son lea ealáhagas, muhto lávkoladdá ain geahppadit geađggis geađgái, go luossa han galggašii. Su mielas lea juohke jagi seamma somá go bivdoáigi álgá.

– Na, erenoamáš suohtas - orru ahte olmmoš vel nuorasmuvvá go deike beassá!

Lávvardaga gaskabeaivái ii lean son, eaige earát dakko lahkosiid, fidnen maidege, muhto dan geažil ii lean gal skurtnjagan go áibbas luosa haga ii leat su dállu gal.

Diimmáš luossa

– Mus lea vel muhtun sneaida diimmá luossa. Dán jagi gal ii leat vuos guoskkahan ii geasa ge.

Báikki olbmuide dat rahppui luossabivdinlohpi dán vahkkoloahpa ja Antti Niilesa mielas lea hui ráfálaš dilli ovdal go turistabivdu álgá. Go turisttat šávihit, de gal šaddá váddásat beassat ja čáhkat oaggunmuddui, muitala son.

Buoremus luossajohka

Deanu čázádat lea dat johka dáppe Davvi-Riikkaid gaskkas, gos eanemus luossa goddo jahkásaččat, diibmá oktiibuot 79 tonna, Suoma ja Norgga bealde. Nubbin buoremus norgga jogain, Namsen čázádat, attii diibmá badjelaš 30 tonna.

Dál lea "ieš"

Pekka Guttorm gal hoigadii fatnasis joga ala ja manai sugadit. Fanas gal lea dan mađe ođđa fanas ahte ii leat gal dárbbašan dáidnádit. Sus lea nana háliidus johkaeallimii ja luossabivdui.

– Na, dan gal go agibeaivvi leat hárjánan, bajás dakko šaddan, mánnávuođa rájes –

ja, galggai nágget ahte beassat joga ala, illá lávejedje gal fuollat mu.

Muhto dál it dárbbaš nágget?

– Dál in dárbbaš earáin nákkáhallat; beasan ieš mearridit.

Ieš dat luossaáddjá, ii lihkostuvvan gal gáddái, Pekka ja Ántte Niilasguoktás. Muhto sudno bajábealde gal lei eará bivdi viežžalan 8 kilo guoli. Akseli sáhttá leat dalle dat vuosttas almmái gii dán bivdolobis fidne luosa, oaivvildit Geavgŋá bivdit.