Doaivu Deanu bissut buhtisin

– Deanu čáhci galgá leat nu buhtis ahte galggat sáhttit juhkat dan. Dat lea mihttomearri riikkaidgaskasaš oktasaš prošeavttain, čilge Deanu ossodathoavda.

Svein Ottar Helander geahččá Deanu gova

BUORI MUITTUT: – Deanus lea leamaš buhtes čáhci áiggiid čađa, ja nu dat ain ferte leat, čilge Deanu ovdánahttin ossodathoavda Svein Ottar Helander go geahčada gova.

Foto: Nils Henrik Måsø / NRK

Ikte Finnmárkku fylkkagielda juolludii 582.500 kruvnnu čázádaga buhtistan ulbmilii.

– Dieđus ge lean duhtavaš juolludeamen, vástida Deanu gieldda ovdánahttin ossodathoavda Svein Ottar Helander.

Deanu, Ohcejoga ja Kárášjoga gielddat dat leat guovvamánus boahtte jagi álggaheamen Interreg-prošeavtta maid gohčodit «Joint environmental management of the Tana river».

  • Guldal:

Buhtistangozihan-prošeakta bistá golbma jagi ja máksá sullii 4,3 miljovnna kruvnnu.

Ohcejoga ja Deanu gielda leaba ovdal čađahan máŋgga geavahusplána bargguid, muhto plánaáigodat lea loahpahuvvon. Ođđa Interreg-prošeakta galgá leat joatkka daid bargguide.

– Dattege dat ii mearkkaš ahte Deanočázádaga čáhcekvalitehta lea heajos dilis. Dál čázi oaččut roahkkadit juhkat, ja nu galggat maid sáhttit boahtte áiggis, čilge Helander.

Intereg-prošeavtta ulbmil lea gozihit ja fuolahit birrasa nu ahte Deanočázádat seailu ja bissu buhtisin.

Bearráigehččet buhtistanrusttegiid

EU-direktiivvaid geažil Suomas ja Norggas doibmet seamma lágan njuolggadusat.

– Mannan geasi gielddaid njunušpolitihkkárat ja fágaolbmot fitne geahččamin gielddaid buhtistanrusttegiid. Das oidne ahte buot doibmet ulbmilaččat, muitala Helander.

Gielddain leat buhtistanrusttegat dáppe dál:

  • Deatnu: Ruostefielmmás, Sieiddás, Deanu šaldis, Skiipaguras ja Buolbmágis.
  • Ohcejoga: Njuorggámis, Ohcejogas ja Gáregasnjárggas.
  • Kárášjohka: Kárášjoga čoahkkebáikkis

Kloáhkka njuolgga Detnui

Vaikko rusttegat dál doibmet ulbmilaččat, de Deanu sátnejođiheaddji, Frank Martin Ingilæ, dattege ii sáhte dáhkidit lihkohisvuođaid vuostá.

Dan čájehit earret eará mannan dálvvi dáhpáhus Kárášjogas, Ingilæ vástida.

Guokte stuorra ásahusa, SANKS ja Sámediggi, kloáhkkakummat eai šat doaibman nu mo galge, ja kloáhkka golggai njuolgga Detnui .

Iešguđet lágan hástalusat

Frank Martin Ingilæ på ordførerkontoret

BUORET SIHKKARVUOHTA: Go gielddain lea oktasaš bearráigeahččan-prográmma, de dat addá buoret sihkkarvuođa nuoskkidemiid vuostá, oaivvilda Deanu sátnejođiheaddji Frank Martin Ingilæ.

Foto: Nils Henrik Måsø / NRK

Ingilæ mielas lea buorre go gielddat ásahit oktasaš bearráigeahččan-vuogádagaid.

– Gielddain leat maid iešguđet lágan hástalusat. Deanu šaldi rusttet lea dan mađe boaris, ahte livččii áigi dan lonuhit. Kárášjogas ges jáhkkimis fertejit molsut gielddaguovddáža kloáhkkarevrriid.

Luossadutkamat

Interreg-prošeavtta ulbmil lea maid čađahit guollenáli dutkanprošeavttaid.

– Lea dehálaš diehtit eambbo makkár oalgejogain luossa johtá ja gođđá dál, ja gos ovddeš áiggiid lea dahkan. Ja mat sáhttet heađuštit luosa goargŋumis oalgejogaide, Helander čilge.

Luossagoargŋumat leat heađuštuvvon ollu oalgejogaide maŋŋá go geainnu ásahuvvojedje goappat beale riikkarájá.