– Mii vuordit ahte mii oažžut juoidá ruovttuluotta go mii addit min muitalusaid Disneyi, dadjá Internášunála Sámi Filbmainstituhtta (ISF) direktevra Anne Lajla Utsi.
Walt Disney Animations leamaš dán vahkus galledeamen Sámi ja Norgga. Ulbmil lea ahte sámi kultuvra govviduvvo buoremus láhkai ođđa Frozen – Čoaska fearánat 2 filmmas.
Danin čoahkkinasttii earret eará Oscar-vuoiti Peter Del Vecho sámedikkiin. Vuosttas Frozen – Čoaska fearánat filbma ilmmai 2013:s. Filbma šattai historjjálaš dán dáfus go ii oktage eará animašuvdnafilbma leat tinen nu ollu ruđaid ovdal.
Olles 10 miljárdda kruvnna tinii filbma. Dasa lassin vuittii guokte Oscar bálkkašumi.
Disney-buvttadeaddji Del Vecho dajai NRK:i ahte sámi kultuvrras lea erenomáš historjá.
– Midjiide lea hui gelddolaš gávdnat ođđa vugiid muitalit muitalusaid, ja dan vuoigi mielde mii sáhttit ráhkadit filmmaid mat ollet viidát, dadjá Del Vecho.
Čiegus mii dáhpáhuvai gaskal Disney ja Sámedikki
Lei Sámediggi guhte bovdii Disney boahtit Sápmái. Sámedikki bealis galgá direktevra Rune Fjellheim gulahallat ja doaimmahit čoahkkimiid gaskal Walt Disney ja Sámedikki.
Muhto Fjellheim ii daja vuos sáhttit muitalit man birra Disney ja Sámediggi leat hállan.
– Mii leat háleštan ja joatkit gulahallama Disneyn, dadjá Fjellheim.
– Beasai go Sámediggi oaidnit osiid filmmas?
– In sáhte kommenteret dáđi eambbo, vástida Sámedikki direktevra.
NRK Sápmi lea lohkan kommunikašuvnna gaskal Sámedikki ja Disney mii dáhpáhuvai ovdal čoahkkima. Doppe bođii ovdan ahte Disney áiggui ovdanbuktit osiid filmmas Sámediggái, ja oažžut Sámedikkis oaiviliid dasa ahte lea go dáhkon dohkálaš láhkai.
– Geat galget muitalit álgoálbmot muitalusaid?
Sámi artistta Frode Fjellheim ráhkadii musihkka dan vuosttaš Frozen – Čoaska fearánat filbmii. Son maid doivvošii nu mo ISF-direktevra ahte ođđa filbma buvttašii juoidá Sápmái.
– Lea buorre go Disney ná dárkilit bargá vuoi sámi kultuvra šattašii riekta filmmas. Soaitá ahte dát buktá juoga nu sámi kultuvrii, dajai Frode Fjellheim guhte lea Rune Fjellheima viellja.
ISF:a direktevra Anne Lajla Utsi mielas lea dehálaš ahte Frozen 2 filmma lea vejolaš oaidnit ja gullat sámegillii.
– Álgoálbmot filbmamáilmmis lea dál hirbmat debáhtta justa dán birra ahte geat galget muitalit álgoálbmot muitalusaid? Nu ahte mii vuordit Disney ovttasbargá sámi filbmadahkkiiguin. Ovdamearkka dihte ahte mii beassat dubbet dan ođđa Frozena sámegillii, dadjá Anne Lajla Utsi.