Son lea ieš guolástanhálddahusa stivrralahttu ja ovddasta Kárášjoga gieldda. Muhto Sæther ii leat daid gaskkas gean Deanočázádaga vuoigatvuođalaččat háliidit čievččastit eret, ja bidjat eará olbmuid sadjái.
Deanu Luossabreavaeaiggádat AL (LBT) dat lea bovden vuoigatvuođalaččaid oktasaščoahkkimii borgemánu 11. beaivve go leat duhtameahttun dainna bargguin maid TF-stivrra lea dahkan.
- LOGA MAID DÁROGILLII:
Vuoigatvuođalaččat leat sii geain lea lohpi bivdit luosa firpmiiguin Deanočázádagas, dahje maid nu gohčoduvvon luossabreavaeaiggádat.
GULDAL:
Oktasaščoahkkima ulbmil lea čievččastit Deanočázádaga guolástanhálddahusa stivrra eanetlogu, nammalassii daid stivrraáirasiid geat ovddastit vuoigatvuođalaččaid, oktiibuot vihtta áirasa.
– In ádde manne dát áirasat galget čievččastuvvot stivrras. Sii han leat bargan máilmmi buorre barggu. Galggašedje baicce oaččut giittu eaige bálkestuvvot, vástida Kjell Sæther.
– Ollu luossa fas jogas
Son lea ieš áŋgiris luossabivdi.
– Dán geasi lean goddán ollu luosaid, sihke stuorra ja smávva luosaid, mojohallá Sæther.
– Lea leamaš beanta somá čuččodit ja čohkohallat johkagáttis ja vásihit go luosat ihtalit. Dán láhkái eat leat beassan hervvoštallat guhkes áigái.
Sæther ii jáhke ahte ná ollu luossa livččii bállen gorgŋet čázádaga gierragiidda jus Deanočázádaga guolástanhálddahusa stivrra ii livččen gáržžidan dán jagi luossabivddu.
Iešguđetlágan njuolggadusat suhttadit
Muhto gáržžideapmi ii leat čađahuvvon miehtá čázádaga, muhto dušše daid osiin ja oalgejogain mat leat Norgga bealde. Suoma ja Norgga rájá alde leat sihke turisttat ja báikegotteássit beassan bivdit nu movt ovdal ge.
Dá lea ge okta dain máŋga sivain mat leat suhttadan luossabreavaeaiggádiid searvvi (LBT).
– Min mielas lea boastut gáržžidit luossabivddu dušše muhtun sajiin. Muhto maiddái fuones gulahallan dagaha, ahte mii háliidat válljet ođđa láhttuid guolástanhálddahusa stivrrii, čilge LBT stivrralahttu Benn Larsen.
Manná váikko diggái áššiin
Muhto Deanočázádaga guolástanhálddahus (TF) lea bidjan ollu návccaid orustahttit almmuhuvvon oktasaščoahkkima gos vuoigatvuođalaččat áiggošedje válljet ođđa stivrraáirasiid.
Guolástanhálddahusa stivrrajođiheaddji Helge Samuelsen, lea lohkan mannat vaikko diggái jus čoahkkin dollojuvvo nie movt lea almmuhuvvon. Su mielas lea dušše TF, iige LBT, mii sáhttá doallat dákkár oktasaščoahkkima.
- LOGA MAID DÁROGILLII:
- LOGA MAID DÁROGILLII:
Muhto čoahkkin dollojuvvo nu movt almmuhuvvon, muitala Benn Larsen.
– Mis lea buorre juridihkalaš vuođđu dása. Dan lea min advokáhta, alimusrievtti advokáhta Tor N. Rekve duođaštan.
Kjell Sæther ii leat sihkkar, ahte lea go riekta duvdit ášši diggái jus LBT vállje ođđa áirasiid, nie movt Samuelsen áitá.
– In sáhte vástidit maidige ovdal go Samuelsen lea čilgen ášši birra, lohká Sæhter. Son aŋkke ballá čuožžileames moivvi jus LBT vállje ođđa stivrraáirasiid.
– Eat sáhte joatkit moivediliin
Nubbi eará Deanočázádaga guolástanhálddahusa stivrralahttu, Ingrid Nordal, ges oaivvilda leat áibbas endorii jus ášši gártá diggái.
– Ášši lea dál jorron riidoáššin. Moivi ii šatta unnibun jus joatkit dáinna diliin. Ja dat ii leat buorre, ii geasege, oaivvilda Nordal.
– Jus vuoigatvuođalaččat bállejit čoahkkinastit ja válljet ođđa áirasiid nie movt háliidit, de han dát sáhttá čoavdit buot daid váttisvuođaid ja unohisvuođaid mat leat čuožžilan.
– Fuones gulahallan
Ingrid Nordal mielas Deanočázádaga guolástanhálddahus dál menddo funet gulahallá vuoigatvuođalaččaiguin.
GULDAL:
– Sihke dat ja eará áššit leat mielddisbuktán ollu moivvi. Dat lea unohas, ja hehtte TF-stivrra bargomovtta. Dál fertet váldit “time out”.
Nordal muittuha ahte stuorra eanetlohku vuoigatvuođalaččain, oktiibuot 76 proseantta, leat gáibidan TF doallat oktasaščoahkkima.
– Amma han dalle livččii alfárot lunddolaš diktit vuoigatvuođalaččaid doallat čoahkkima ja válljet ođđa áirasiid, Nordal oaivvilda.