Beroštatgo sámi kultuvrras? Vai hálidatgo baicce oaidnit man láhkái sápmelaččat dáidaga, musihka ja kultuvrralaš ovdánbuktima bokte čájehit siskkimus dovdduideaset? Dalle lea ”Sápmelaš oaivil” rivttes TV-prográmma dutnje.
Ođđa prográmmahámádat
Vuosttaš sátta mánnosaš prográmmas lea duorastaga čakčamánu 29. beaivve diibmu 17.25, justa maååá sámi TV-ođđasiid ja justa ovdal sámi mánáid-TV. Ođđa prográmmahámádagas čállo ahte Sápmelaš oaivil lea ”áigeguovdilis ja guoimmuheaddji kulturprográmma, mii čájeha dan mii dáhpáhuvvá sámi kultuvrralaš, dáiddalaš ja dieđálaš eallimis”.
- Dát lea hirbmat miellagiddevaš prográmmahámádat. Doaivvošin ahte nákcešeimmet heivehit áššiid nu ahte olbmot áddejit daid. Livččii vuogas jus prográmma šattašii olbmuide ávkin, sávvá prográmmajođiheaddji Dan Robert Larsen.
Eai ollislaš duohtavuođat
Sápmelaš oaivil ii galgga vuosttažettiin čájehit sámi kultuvrra fuones beliid, muhto baicce čájehit čáppisvuođa ja man gelddolaš dat sáhttá leat. Liikká sáhttá prográmma gieđahallat áššiid mat sáhttet leat riidogaskaoapmin.
- Mii diktit dáiddáriid ja dáiddaberošteaddjiid buktit oaiviliiddiset sihke sámi dáidagis, musihkas ja eará kultuvrralaš ovdanbuktimis. Dát oaivilat eai dárbbaš leat ollišlaš duohtavuođat, muhto cealkámušat mat bohciidahttet digaštallamiid gehččiid ruovttuin dahje bargosajiin, čilge Larsen.
Dáidda ja musihkka
Vuosttaš sáddagis dollet dáiddačájáhussii, mii lea Galleri F15is Jeløyas, Mátta-Norggas. Mii gullat maid Dagbladet áviissa dáiddaárvvoštalli oaivvilda dán čájáhusa birra ja makkár dási sámi dáidda muđui doallá.
Deaivat maid nuorra sámi hiphop-artistta, gii lea vuogas ovddasteaddji ođđa, nuorra ja čeahpes sámi artisttaide. Sápmelaš musihkkajournalista oaivvilda, ahte ođđaáigásaš sámi musihkas leat máåga buori jagi ovddabealde, maŋŋá moadde heajos jagi.
Juohke prográmmas lea maid studioguossi, gii hállá dáidagis birra ja addá vel gehččiide máistaga das.
- Dát sáhttá šaddat somá. Doaivumis šaddá gehččiide maid seammá somá go dat mii mis lea leamaš gog leat bargan prográmmain, árvala Dan Robert Larsen. Eanaš TV-gehččiide son lea eanemus dovddus sámi TV-ođđasiid fuolaheaddjin.
Geahča Nett-TV:as: