– Mun jáhkán olbmot leat váillahan bellodaga mii váldá olbmuid duođas, ja mii duostá digaštallat maiddái daid váttes áššiid. Áššiid maidda olbmot leat ovtta oaivilis, muhto maid sáhttá leat váttis ovddidit, dadjá Kåven.
Son lea Nordkalottfolket joavkojođiheaddji Finnmárkku ja Romssa fylkkadikkis, ja illuda go bellodat fas ovdána.
Fylkadiggeválggain 2019 oaččui bellodat 1,8 proseantta jienain. Ođđa oaiviliskkadeamis, maid In-Fact lea dahkan NRKa ja Altapostena ovddas, oažžu bellodat dál 10,1 proseantta jienain Finnmárkkus.
Romssas ii leat bellodat seamma bivnnut, ja iskkadeami dieđuid mielde ožžot doppe dušše 1,8 proseantta jienain.
Dattege lea Kåven duhtavaš loguide.
– Mu mielas lea hirbmat buorre, dat čájeha ahte ovdánat ja ahte leat lihkostuvvan go mii nu čielgasit muitalit maid oaivvildit, dadjá Kåven.
Finnmárkku fylkamihtideapmi 2019-2023
| Parti | Oppslutning | Endring |
|---|---|---|
| 24,3% | −5,1 | |
| 16,9% | +8,9 | |
| 11,5% | +2,0 | |
| 7,7% | +4,0 | |
| 7,6% | −6,0 | |
| 7,4% | +4,1 | |
| 6,8% | −17,3 | |
| 3,0% | +0,9 | |
| 2,1% | −1,3 | |
| 1,8% | −1,1 |
Ovddádusbellodat sturron beliin
Oaiviliskkadeapmi čájeha maid ahte Ovddádusbellodat lea dál beali stuorat go 2019 válggain, ja oažžu 16,9 proseantta jienain Finnmárkkus ja 17,5 proseantta Romssas.
Sámelistu oažžu fas 2,7 proseantta jienain, ja Sámi Álbmotbellodat fas 1,1 proseantta.
Iskkadeami mielde Nordkalottfolket oččošii 4 áirasa Finnmárkku fylkkadiggái, ja Sámelistu fas ovtta áirasa sisa.
Válgadutki Jonas Stein mielas lea Nordkalottfolket ovdáneapmi mearkkašahtti.
DEHÁLAŠ: Válgadutki Jonas Stein oaivvilda sámi áššiid šaddan dehálažžan finnmárkulaččaide.
Foto: Rune N. Andreassen– Ahte bellodat oažžu nie nana joavkku, ja Sámelistu maid ovtta, čájeha ahte sámepolitihkka lea dehálaš Finnmárkku álbmogii, dadjá Stein.
Jus válgaboađus šattašii nugo otná oaiviliskkadeapmi, de šattašii Finnmárkku fylkkadikkis borgárlaš eanetlohku.
– Muhto bealit leat hui dássálaga,ja bellodagat fertejit soabadallat, ja nu sáhttet čuožžilit vuordemeahttun ovttasbarggut, dadjá Stein.
Háliidit eambbo mohtorjohtolaga meahccái
Nordkalottfolket lea jitnosit jienádan ahte mohtorjohtolatláhka ferte rievdaduvvot, earret eará lohkkiidreivviid bokte.
Muhto Bakken Kåven lohká ahte ii leat dušše dan dihte sii leat ovdánan.
– Ii leat dušše dát okta ášši, dat lea oassin stuorát govas. Muhto diehttelasat, olbmot leat dolkan šaddamis bahádahkkin jus háliidit luonddu ávkkástallat nugo álo leat dáppe dahkan.
Maiddái Rukses bellodat ovdána sihke Romssas ja Finnmárkkus, muhto Ovddádusbellodat dat ovdána buot eanemus.
– Sámi áššit sáhttet váikkuhan dasa, muhto maiddái Muolkkuid ášši, gos Ovddádusbellodat lea leamaš čielggas ahte eai doarjjo elektrifiserema, ii fal sámi perspektiivvas, muhto elrávdnjehattiid geažil. Ja dat mobilisere olbmuid, dadjá Stein.
Bargiidbellodat manná maŋos, muhto eanemus unnu Guovddášbellodat, mii lea gahččan 24 proseanttas Romssa ja Finnmárkku fylkkadiggeválggain 2019, 8 prosentii Finnmárkkus ja 5,5 prosentii Romssas.
