«Ella» lávlla lea beaggán Sámis juo moaddelot jagi, earret eará lea Intrigue joavku almmuhan dan iežas skearrus.
Oallugat eai dieđe ahte lei Kárášjot rockjoavku Molotov Cocktail geat ráhkadedje Ella lávlaga, ja ahte das lea hui erenoamáš historjá.
1991 čavčča lei Molotov Cocktail turnémátkis Ruoššas go deaividii ilgadis biilalihkohisvuohta.
Olles joavku lei seamma biillain johtimen go guorbmebiila bođii ovddal ja beaškkehii singuin oktii. Dušše okta sis beasai das heakkas, Kimme Utsi (18).
Kimme lea dál 47-jahkásaš ja dat áidna guhte odne sáhttá muitalit dan nuorra ráhkisvuođa birra.
17-jahkásaš váibmosuola
Guovdageaidnulaš Ella Hætta Fjellheim (46) lea son geasa Kimme ja joavkku vokalista, Ken Magne Høgden rohkki, leigga liikostan dalle 90-logus.
Jagi ovdal lihkohisvuođa čáliiga soai teavstta lávlagii. Dalle sii ledje 16 ja 17 jahkásaččat.
Ella ii diehtán ahte su lagaš olbmá guovttos leigga lávlaga sutnje ráhkadan.
– Munnos Ken Magniin lei dego veaháš gilvu goabbá munnos oažžu su, muittaša Kimme mojonjálmmiid.
L.A. šattai Ella
Sii ledje álggos čállán lávlaga eaŋgalasgillii, dalle lei das namma L.A. Ovtta beaivvi hárjehaladettiin Ken Magne lávlugođii dan sámegillii,ja de šattai «Ella».
– Mun dalán bissehin min hárjehallama ja čállen sámegillii olles refreaŋga. Ken Magne ges aiggui čállit daid vearssaid ruovttus, muittaša Kimme.
Nu riegádii «Ella» lávlla.
Ella mielas lea ain lossat hupmat iežas lagaš olmmáirohke, Ken Magne birra, muhto ražasta lihkká.
Go jápmin earuha
Ella lei 18-jahkásaš go gulai biilalihkohisvuođa birra ja oaččui dan jápmasága.
Eallin čáhpodii. Ii son nagodan jurddašit olus eanet go ahte lei massán iežas buori olbmá, Ken Magne.
Son gulai ahte sudnos Kimmein lei lávlla Ellai, muhto morraša siste dat dego láhppui.
– Mun dihten ahte sis lei rockajoavku, muhto in mun das goasse nu beroštan, muitala Ella.
Sutnje lei baicca dat olmmáivuohta mii lei erenoamáš.
Konsearttas fas badjánit dovddut
Čieža jagi maŋŋel biilalihkohisvuođa čuodjá Ella telefuvdna.
Lea Intrigue joavkku lávlu, Kai Somby gii riŋge. Sin skearrus galggai Ella lávlla leat mielde, muitun Molotov Cocktail jovkui. Sii háste Ella boahtit sin konsertii.
Dan konseartta son ii vajálduhte goassege.
Youtube:
– Lei vuosttašgeardde go gullen dan lávlaga. Badjáne ollu dovddut, vaikko in nagodan gullat olles teavstta, lohka Ella.
Ráhkásnuvvan olbmážat
Maŋŋel konseartta oaččui son árkka masa teaksta lei čállon. Dat árka ii rahppon ovdal ruovttus.
Easka dalle, iežas soffás, Romssás.
Easka čieža jagi maŋŋel go Ken Magne duššái, ipmirdii son ahte Ken Magnes ja Kimmes várra ledje garraset dovddut Ellai go dušše olmmáivuohta.
– Munnje lea váttis vástidit maid soai duođai dovddaiga dalle, muhto go mun guldalan dan lávlaga de orro nu ahte sudnos ledje eanet dovddut munnje go mus sudnuide, dadjá Ella jaskkadit.
Kimme čilge ahte refreangain son dieđusge oaivvildii dan ahte son livčče háliidit Ella iežas moarsin dalle.
Soai Ken Magniin eaba goasse šaddan ságastallat justte maid soai oaivvildeigga teavsttain. Kimme lihkká jáhkká ahte son dulko riekta go lohka ahte lávlagis leat sudno jurdagat ja dovddut Ellai, ja dan birra go balaheigga Ella goabbat guoibmáseaskka.
Kimme bohkosa ain gaskkohagaid go muittaša sin nuorravuođaeallima.
Soai Ken Magniin leigga goappašagat nu liikostan dan čáppa Ellai.
Lávlla vel báhcán
«Ella» lávlla lea dat áidna mii lea vel báhcán Molotov Cocktail maŋis, ja dat ain dego eallá iežas eallima. Anne Gro Gaup ja Treven Kaaby leaba gieskat almmuhan iežaska veršuvnna dan lávlagis.
– Mun lean álo liikon dán lávlagii, danne válljejin justte dán. Barggadettiin easka dovden makkár gudni lea justte dáinna lávlagiin beassat bargat, lohka Treven Kaaby.
Ella lohka ipmirdit bures go artisttat háliidit lávlut lávlaga,go dat lea su mielas maid hui fiinnis.
– Mun láven ieš maid ain muhtomin guldalit dan, loahpaha Ella Hætta Fjellheim.
Guldal olles Ella lávlaga (ekstern lenke) maid Molotov Cocktail lávlo Ruoššas 1991:as.
Loga nai:
Loga nai: