Marte (33) lea giitevaš go Álttá dáistaleaddjit gálle luottaid dálá nuoraide

– Álttá-dáistaleapmi lea mearkkašan olu midjiide, geat dál leat nuorat. Dat, ahte leat sápmelaš dál, livččii vissásit olu váddáset jus Álttá-ášši ii livčče leamaš, dadjá Fjellheim Sarre NRK Sápmái.

Nuorra neavttár ii lean vel ii jurddašuvvonge dalle go Álttá-dáistaleapmi dáhpáhuvai.

Iŋgor Ántte Áilu Gaup lei gis dalle nuorra, virkui ja politihkalaččat aktiivvalaš. Son lei roahkkat ja dihtomielalaš.

– Mun ledjen dalle 21 jagi boaris ja váldojin golbmii gitta politiijaide, muitala Iŋgor Ántte Áilu Gaup.

Soai čuožžuba ovttas seammá lávddi alde maŋŋebárgga, go Beaivváš Sámi Našunálateáhteris lea «Ellos eatnu!» vuosttaščájálmas Tromssas.

– Dego livččii soahtedilli

Čájálmas lea doku-dráma Álttá akšuvnna birra 1979 rájes gitta 1982 rádjai.

Golmmas, geat oassálaste Álttá akšuvnnas, muitalit iežaset vásáhusaid. Beaivváš Sámi Našunálateáhteris leat jearahallan sin dego áigevihtanin. Muitalus lea dán golbmasa oaidninsajis.

Čájálmasas leat golbma váldodáhpáhusa. Nealgudeapmi Oslos jagis 1979, politiijaveahka Savvonis jagis 1981, Fállejogašalddi bávkaleapmi jagis 1982.

– Doppe lei stuorra politiijavalvi. Čuđiid mielde ledje politiijat guovtte bealde joga. Dain ledje beatnagat. Dain ledje politiijarádiot. Dain ledje militeara veahkkeneavvut, biillat ja visot. Helikopterat girde áimmus. Dat lei dego soahtedilli, muitá Iŋgor Ántte Áilu Gaup.

– Muittut badjánit

Iŋgor Ántte Áilu Gaup lea mearkkašan olu sámi servodahkii ja dáistaleapmái nannet sámi vuoigatvuođaid.

Son lei okta dain, geat ráhkadedje čájálmasa «Min duoddarat», mii šattai álgun Beaivváš Sámi Našunálateáhtera vuođđudeapmái.

Iŋgor Ántte Áilu Gaup lea das rájes bargan teáhteris.

Bargu «Ellos eatnu!» čájálmasain boktá olu muittuid.

– Dat lea measta dego ođđasit fas boahtit dan dillái mii dalle lei. Olu muittut ja govat badjánit ain millii, muitala son.

Seammás son muittuha, ahte sámi dáistaleapmi ii eisege vel leat nohkan.

– Lea dieđusge dehálaš dan maid čujuhit man láhkái stuorraservodat meannuda min álbmoga vuostá. Luonddu vuostá. Min rivttiid eai váldde vuhtii. Dát dilli lea ain otná beaivve. Sáhtán namuhit bieggajorriid, ruvkedoaimmaid ja dan ahte ruskejit min vuonaideamet. Vahágis lea dát čájálmas hirbmat áigeguovdil dál, muittuha Iŋgor Ántte Áilu Gaup.

Álo gullan Álttá-dáistaleamis

Vaikko Marte Fjellheim Sarre ii leat ieš vásihan Álttá-dáistaleami, de lohká dáid dáhpáhusaid álo leamaš oassin su eallimis.

– Mun lean dán birra oahppan skuvllas. Mu bearaš lea hállan dán birra das rájes go ledjen unni, čilge Fjellheim Sarre.

Dasa lassin lohká iežas oahppan mearihis olu dáinna čájálmasain barggadettiin.

– Dat, geat muinna leat lávddi alde, leat ieža vásihan nu olu. Sis leat nu olu dieđut. Go singuin lean ovttas lávddi alde, de oaččun dakkár dovddu dego ieš livččen dan vásihan. Dat addá munnje mearihis buori dovddu, muitala nuorra neavttár.

Čájálmas ovdanbuktojuvvo dialoga, monologa, lávluma ja luđiid bokte. Čájálmasas leat maid dokumentáralaš oasit.

Iŋgor Ántte Áilu Gaup sávvá geahččiid oahppan juoidá go leat oaidnán čájálmasa.

– Mun sávan dat boahtá čielgasit ovdan man badjelgeahččalas stuorraservodat lea, go guoská min rivttiide, min álbmoga iežas várjaleami rievtti.