Sofia Jannok: – Álttá-dáistaleapmi lei olles Sápmái ávkin

– Munnje lea stuorra gudni go mus jerre searvat dán filbmii. Dát lea hirbmat dehálaš filbma.

Dan lohká sápmelaš artista ja neavttár, Sofia Jannok, NRK Sápmái.

– Mu namma lea Risten dán filmmas. Mun lean ovdagovvan váldorollii, man Ella Marie Hætta Isaksen neavttaša. Risten lea dakkár olmmoš, gii guhká lea beroštan sámi vuoigatvuođain. Son geahččá dán akšuvnna dehálažžan olles Sápmái. Son boahtá Ruoŧa beale Sámis ja háliidivččii čájehit, ahte dát ii guoskka dušše Áltái, čilge Jannok.

Mo orru mannamin du mielas?

– Mu mielas lea hui somá ja manná hirbmat bures. Mu mielas lea nu suohtas go leat nu olu sápmelaččat mielde sihke kámera ovddabealde ja maŋábealde. Dát filbma váldá sápmelačča buorebut vuhtii go mun lean ovdal vásihan, illosa Jannok.

– Olu oahppat Álttá giččus

Bagadalli Ole Giæver lohká, ahte Álttá-dáistaleapmi lea muitalus mii su lea čuvodan mánnávuođa rájes.

– Áhččán lei mielde álbmotakšuvnnas. Mii oruimet Álttás dalle dan áigge go dát akšuvnnat ledje. Munnje dát lea álo leamaš oassin mu bajásšaddamis. Ledjen hirbmat rámis dainna go áhččán lei dás mielde, čilge Giæver.

Son lohká alddis guhká leamaš miela ráhkadit filmma servodaga birra. Dalle Álttá gižžu hui fargga iđistii su jurdagii.

– Mii sáhttit olu oahppat Álttá giččus. Dás lei dakkár kollektiivvalaš mobiliseren ja solidaritehta vuođđun. Go guorahallen ášši vel ain eambbo, de oidnen man stuorra mearkkašupmi dán giččus lea olles sámi álbmogii, čilge Giæver.

Son deattuha, ahte sutnje lea dehálaš dán filmma ráhkadit sámi perspektiivvas.

– Dál leat fargga geargan filbmemiiguin. Mis leat golbma beaivve vel filbmet maŋimuš dálveakšuvnnaid Savvonis. Dasto lea beaivi vel filbmet dáhpáhusažiid Álttás, čilge Giæver.

Vuosttaščájáhus šaddá sullii jagi geažes, ođđajagimánus dahje guovvamánus jagis 2023.