NRK Meny
Normal

Mánnávuođa muittuiguin Københápmanii

Marry Ailonieida Somby lei 23 jagi boaris go almmustahtii vuosttaš mánáidgirjji. Dál go lea badjel 60 jagi, de lea evttohassan davviriikalaš girjjálašvuođa bálkkašupmái.

Marry Ailonieida Somby

Marry Ailonieida Somby čállá iežas mánnávuođa muittuid birra girjjis «Čerbmen Bizi Girdipilohtta», mainna lea evttohassan davviriikalaš girjjálašvuođa bálkkašupmái.

Foto: Yngve Olsen Saebbe

Son lea árvaluvvon Davviriikkaid ráđi mánáid ja nuoraid girjjálašvuođabálkkašupmái, girjjiin «Čerbmen Bizi Girdipilohtta».

Son ja Berit Marit Hætta, guhte lea govaid sárgon girjái, vuolgiba doaluide Københápmanii, go vuoitit almmuhuvvojit.

Gula radiojearahallama vuollelis artihkkalis!

Bajásšaddan boazodoallobearrašis

Berit Marit Hætta

Berit Marit Hætta lea njuohtan govaid Marry Ailonieida Sombby girjái Čerbmen Bizi Girdipilohtta.

Foto: Anne Olli / NRK

Marry Áilonieida Somby lea bajásšaddan boazosámi bearrašis Deanu gielddas. Son lea girječálli ja orru dál Tromssas.

Iežas vuosttaš girjji, «Ámmul ja alit oarbmælli», almmustahtii son 1976.

Dát girji leage dat vuosttaš mánáidgirji mii almmustuvai sámegillii. Das rájes lea son čállán olu girjjiid mánáide.

Marry Ailonieida Somby girji Čerbmen Bizi Girdipilohtta

Marry Ailonieida Somby girji Čerbmen Bizi Girdipilohtta

Foto: Davvi Girji

Mánnávuođa muittut

Girji «Čerbmen Bizi Girdipilohtta» lea muitalus čearpmaha birra. Bizi dat lea čearpmaha namma ja čearpmaha muitá Somby iežas mánnávuođas.

– Dat lei dakkáraš mii čuvodii mu juohke sajis, muitala Marry Áilonieida Somby.

Nu leage girjji čálus vuolggahuvvon dien mánnávuođamuittus. Muhto son muitala maid olu fuopmášumi ožžon go TV`s lea oaidnán herggiid ja heargevuodjengilvvuin Sámis.