«Čerbmen Bizi - Girdipilohtta» lea mánáidgirji čearpmaha Čerbmen bizi birra man áldu lea guođđán. Okto dat vánddarda meahcis. Doppe son deaivá gilvohearggi, gotti, ealgga, filbmabohcco, njiŋŋelasa Silbbona, gean atnet turistavuojániin, ja loahpas vel girdi golleálddu, mii veahkeha čearpamaha deaivat fas álddu lusa. Nu go buot mánáidgirjjiin lávege, de dán girjjisge lea buorre loahppa.
Marry Ailonieida Somby ja Biret Máret Hættain leaba heivehan čállosa ja govaid oktii, mat ovttas muitalit muitalusa Čerbmen Bizi olu ártegis ja somás fearániid birra.
Davvi Girji lea almmuhan girjji 2013:s.