– Manne joekoen tjetskehke lim juktie daate orre munnjan. Nimhtie jarkoestidh jïh nimhtie barkedh. Dellie jaavoe jeehtim, manne sïjhtem, Jenny-Krihke Dragsten Bendiksen jeahta.
Trööndelaagen fylhkentjïelte dïsse rïngki, dan åvteste govleme Jenny-Krihke lyjhkede gïeline barkedh.
Gïelem gaskesne 250 jïh 300 almetjh Nöörjesne soptsestieh.
Maahtah abpe aamhtsem daesnie govledh:
Geervebe goh voestes vïenhti
Dïhte lea åarjelsaemien gïelekonsulente Rossen tjïeltesne. Dïhte pråvhka ovmessie teksth jarkoestidh, bene dïhte jeatjahlaakan lij.
Jenny-Krihke lea geerjene daelie gosse maanah jïjte åadtjoeh nænnoestidh maagkeres gærjah sïjhtieh lohkedh.
– Voestegh dellie ussjedim daate aelhkie sjædta. Altså maanagærja. Man geerve lea? Movhte gosse eelkim dellie ussjedim wow, daate ånnetje geervebe enn manne ussjedim, dïhte jeahta.
Dïhte tjuara jeatjahlaakan ussjedidh gosse maanide jarkoestehtieminie.
– Manne tjoerem ussjedidh guktie maanah ussjedieh. Guktie ussjedieh gosse nimhtie tjåadtjoeh gærjesne, jih guktie dah ussjedieh gosse numhtie tjaala. Tjoerem aelhkie baakoe gaavnedh, jïh tjoerem aelhkie tjaeledh, dïhte jeahta.
Geerjene sjïdti gosse akte dejstie stööremes guvvieraajroe ietniegïelese bööti.
Stuerebe veeljemenuepieh
Jenny-Krihken maanabaelesne idtji gååvnesh dan gellie gærjah sov vaajmoegïelesne.
– Måjhtam manne Pluppen bïjre jïh soptsesh staaloen bïjre lohkim, menh gærjah daelie eah leah dan brutal goh soptsesh staaloen bïjre, Jenny-Krihke jeahta.
– Dan så luste dan gellie maanagærjah gååvnese. Geerjene sjædtam. Daelie maanah maehtieh jïjtje veeljedh magkeres gærjah sijhtieh lohkedh, dïhte jeahta.
Dan åvteste gååvnese dan gellie ovmessie gærjah, aavode goske maana båetije biejjine jïjtje åådtje, dïhte jeahta.
Joe latjkoem dorjeme edtja akte vielie gærja jarkoestidh.
Gærjah gaajhkesh dovnide
Trööndelaagen fylhkentjïelte laavenjostoe-gööjmigujmie luhkie jaepieh gærjah jarkoestamme.
Daelie 169 gærjah jïh 35 videogærjah åarjelsaemiengïelesne bæjjoehtamme,
Dan jaepien edtjieh 14 orre gærjah jarkoestidh. Voestegh dan jaepien «Doesteles duvrie» bööti, mij lea «Brannbamsen Bjørnis» daaroengïelesne.
Mubpien gærja mij dan jaepien båateme lea «Nemi».
Orremes gærja lea «Soptsesh mumivuemeste» goh uktsie soptsesh tjaebpies illustrusjovnigujmie orre maanaj-tv raajroste mij jaepie 2019 bööti.
Morten Olsen Haugen lea seniorraeriestæjja Trööndelaagen fylhkentjïeltesne. Luhkie jaepiej juassah dïhte voestes gærja «Gruffele» åarjelsaemiengïelesne böötih, jïh dan mænngan Haugen meatan orreme barkedh gellie gærjah bæjjoehtidh.
Morten Olsen Haugen lea aavrehke barkoen åvteste væjkeles jarkoestæjjide.
Foto: Nils John Porsanger / NRK– Mov barkoem orreme haeniedidh. Lea gaajhke dah væjkele jarkoestæjjah goh dah gærjah jarkoestehteme. Naaken vïjhtelåhkeden aejkine, jih naaken voestes aejkine, Haugen jeahta.
Gærjah jarkoestidh ektiedimmiebarkoe gellie ovmessie almetjigujmie.
Sæjhta bïhkedæjjah girmedh goh jarkoestæjjah eadtjaldehtieh, juktie doesth pryövedh jarkoestidh, dïhte jeahta.
tuhtjie joekoen luste gosse abpe tïjjem orre gærjah båetieh, jïh ulmie lea gaajhkesh dovnesh edtjieh gærjam gaavnedh, goh tuhtjieh luste lohkedh.
– Maam joem aalmetjigujmie darjoeminie gosse gærjah vaajmoegïelesne gååvnese. Damtedh sijjen jïjtje gïelem dan stoerre lea juktie sijjem gååvnese Lønnebergese, Mumivuemese, Gogka Dogka Skåajjese jïh dah jeatjah sijjide gusnie orreme, Haugen jeahta.
