Ingá Máiiá lea dán mánu Urbi

Ingá Máiiá Blind lea cuoŋománu Urbi, «Fárrui» šuoŋain.

Dán jagi Sámi Grand Prix ii mannan justa nu go livččii háliidan. Vuos čájehedje boasttu video njuolggosáddagis ja vel vuoittahalai. Dál son oažžu revánšša.

Ingá Máiiá ii oro áibbas sáhttimin jaska čohkkát go oažžu dieđu ahte lea cuoŋománu Urbi. Son muitala dan dehálažžan sutnje.

Dat čájeha ahte vaikko ii vuoitán SGP, de lea šuokŋa buorre ja olbmot liikojit dasa.

– Dat lea diekkár diŋga mii movttiidahttá mu, ahte olbmot liikojit dasa, muitala Ingá Máiiá.

Gilvvus son šattai cuoŋománu Urbin, aitto dal de gazzasii ovddabeallái Hildá Länsmana ja Lávrre. Gilvalettiin ledje nu dássálaga ahte fertiimet lassi duopmáriid váldit veahkkin.

Diibmá ii livčče dáhpáhuvvan

Soaitima vuolde dat lei ahte son oba šattaige cuoŋománu Urbin.

Loga maid: Hildá Länsman – kunstneren som ikke klarer å sitte stille

Jagi dás ovdal ii livčče dát dáhpáhuvvan. Dalle galggai eará olmmoš lávlut dán šuoŋa. Muhto de bissehii koronapandemiija Sámi Grand Prix 2020, ja «Fárrui» šattai baicce gilvalit 2021:s.

– Niels Ovllá riŋgii munnje ja logai alddis lávlaga ja ahte dat artista, gii galggai lávlut diibmá, ii sáhttán searvat dán jagi. Ja de jearai háliidan go mun lávlut, muitala Ingá Máiiá.

Son lohká iežas guhká háliidan searvat Sámi Grand Prixii, muhto sutnje ii leat boahtán rivttes šuoŋa. Dán háve maid lei dehálaš guldalit šuoŋa vuos.

– Mun dadjen sutnje ahte mun ferten guldalit vuos. Heive go munnje? Sáhtán go lávlut dan? Go mun gullen šuoŋa, de dovden ahte dát šaddá hui buorre, Ingá Máiiá čilge.

Oaččui muoŧá mielállin

Niels Ovllá Oskal Dunfjell lea čállán «Fárrui» ovttas muoŧáinis, Biret Margrethe Oskaliin. Soai čáliiga lávlaga dainna jurdagiin ahte beassat Sámi Grand Prixii.

Dát lea juoga maid lea háliidan dahkat ja lea ovdal maid sádden šuoŋa SGP:i, muhto ii leat beassan mielde. Dán háve dovddai ahte lei catchy refreaŋŋa ja šuokŋa. Son bargagođii teavsttain ja šuoŋain, ovdal go hásttii iežas muoŧá mielde mielčállin.

– Son lea čeahppi čállit vearssaid, ja mun smihtten ahte dalle ferte šaddat buorre šuokŋa. Dat lei oalle garantiija perfekšoneret lávlaga, lohká Niels Ovllá.

Rievttes artista lávlagii

Dalle ii lean go gávdnat artistta lávlagii. Ja gii vel buoret go Ingá Máiiá Blind. Niels Ovllá diđii ahte son lea bottus guoimmuhan SGP:s ovdal. Son lea nuorra, čeahppi lávlut ja heive lávlaga fáddái ja hápmái.

– Munno vuosttaš jurdda lei ahte lávlla heivii hui bures sutnje. Ja nu go mun lean ádden, de liikui son maid dasa ja háliidii lávlut SGP:s. Nu ahte lei veahá vinn, vinn situašuvdna, muitala Niels Ovllá.

Logas vel: Thea drømmer om Tokyo Dome – Det starter jo som en drøm, men så må du realisere dem

Justa maid háliida dahkat

Dál čohkká Ingá Máiiá ruovttus Ruoŧa bealde, veahá váivvis go SGP lea nohkan. Son lea giitevaš go lea beassan leat mielde, sihke dál ja guovtte jagi áigi go lei mielde SGP-Cover prošeavttas.

– Dalle bessen čuožžut stuorát lávddis go láven ja bessen oaidnit go ráhkadit musihka. Báddema ja visot, lohká Ingá Máiiá.

Dát lei oassi musihkkamáilmmis maid ovdal ii lean oaidnán iige diehtán mo dat doaimmai. Son dovddai dalle ahte dát lei juoga mainna háliidii bargat. Ahte dat lei somá.

– Go mun ledjen mielde Sámi Grand Prixas dál, de lei dego oktii vel dovdat dan dovddu. Ahte dát lea justa dat, maid mun háliidan dahkat, Ingá Máiiá muitala.

Rievttes video

Koronapandemiija geažil ledje dán jagi Sámi Grand Prix lávlagat báddejuvvon ovddalgihtii. Dáđibahábut čájehuvvui boasttu veršuvdna Ingá Máiiá šuoŋas NRK njuolggosáddagis. Dás oainnát rivttes video.