Olmmáivággelaš Bjørn Inge Mo lea gieskat evttohuvvon Gáissi válgabire vuosttaševttohassan Bargiidbellodaga ovddas, boahtte jagáš Sámediggeválggaide.
Dát boahtá ovdan preassadieđáhusas maid bellodat lea sádden.
48-jahkásaš lei Gáivuona suohkana sátnejođiheaddji gaskal 2003 ja 2015, ja lea maiddái earret eará jođihan Romssa Bargiidbellodaga ovcci jagi.
– In hálit sierravuoigatvuođaid ovtta, áidna čeardajovkui. Buot olbmot geat ásset árbevirolaš sámi guovlluin galget beassat ávkkástallat luondduriggodagaid, celkkii Mo árabut dán jagi (dárogiel-čujuhus).
– Ferte maiddái sihkkarastit ahte eaige mearraresurssat privatiserejuvvo ja addojuvvo earáide, ovdamearkka dihtii Mátta-Norgga fitnodagaide, lasihii maiddái dalle.
Gilvala Helga Pedersena vuosttá
Dáid áiggiid lea Bjørn Inge Mo iehčanas ealáhusdoaimmaheaddji.
Gáissi válgabire Bargiidbellodaga nominašuvdnačoahkkin lágiduvvo golggotmánu 1. beaivve. Válgabirii gullet Romsa-suohkanat mat leat gaskal Gáivuona ja Leaŋgáviikka.
Gieskat bođii ovdan ahte deatnulaš Helga Pedersen lea evttohuvvon Bargiidbellodaga vuosttaševttohassan, Nuortaguovllu válgabires (dárogiel-čujuhus).
Dat mearkkaša ahte Bjørn Inge Mo šaddá Helga Pederseniin gilvalit Sámedikki presideantaevttohassan siskkáldasat Bargiidbellodagas, jos nominašuvdnačoahkkin doarju lávdegotti evttohusa.
Muđui Gáissi válgabiire Bargiidbellodaga nominašuvdnalávdegotti evttohaslistu ná (viđát saji rádjai):
2. Sylvi Vatne Pedersen
3. Per-Mathis Oskal
4. Synnøve Søndergaard
5. Kjetil Johnsen