Goabbá geasuha eanemusat?

– Dat lea dan duohken maid sii sáhttet fállat midjiide, vástida Árjja vuosttaševttohas Ávjovári válgabires, Inger Eline Eriksen Fjellgren guhte lea maid bellodaga presideantaevttohas.

Váikko su bellodat vássán áigodagas lea leamaš mielde čievččasteamen NSR-ráđi, de dattege dovddaha Árjja politihka leat lagat NSR politihka go Bargiidbellodaga.

– Lea váttis diehtit makkár minerálapolitihka Bargiidbellodaga presideantaevttohas Ronny Wilhelmsen áigu čuovvut. Váikko lohká bellodaga áigut vuostálastit, de ieš gal lea mielas Nussira plánaid roggat minerálaid Fálesnuoris, čilge Eriksen Fjellgren.

• Loga maid: Árja: – Allet vajáldahte sámi buhcciid

Ii čana vuos geasage

Dattege ii loga Árjja čatnat makkárge bellodahkii vuos.

Seammá vástida Šiella jođiheaddji ja presideantaevttohas Vibeke Larsen.

– Makkár politihka soai áiguba fievrridit guovlluin gos sámegiella ii leat nanus, dat ferte mearridit goappá mii válljet, Aili vai Ronny, lohká Larsen.

Dattege dovddasta iežas leat sosiálademokráhta.

– Muhto dat ii mearkkaš ahte Šiella doarju Bargiidbellodaga, go min bellodagas leat olbmot geat deattuhit iešguđet áššiid. Dasa lassin lea váttis earuhit NSR ja Bargiidbellodaga politihka, čilge Larsen.

– Váttis earuhit

Maiddái Gáisi Ovddádusbellodaga 1.evttohasa, Aud Marthinsena, mielas lea váttis earuhit NSRa ja Bargiidbellodaga politihka.

– Bušeahtaid oktavuođas eai leat go proseanttat mat earuhit dán guokte bellodaga politihka, lohká Marthinsen.

Son ii dáhtu dovddahit goabbá bellodat lea lagat Ovddádusbellodaga váimmu.

Iige Ávjovári Johttisápmelaččaid listtu 1.evttohas Berit Marie P. E. Eira, loga iežaset dál vuos čielgasit sáhttit vástidit goappáin sii háliidit náittosdili.

– Midjiide lea ealáhuspolitihkka deháleamos, ja de fertet oaidnit makkár fálaldagaid oažžut ovdal go maidige mearridat, čilge Eira.

– Minerálapolitihkka mearrida

Maiddái Ávjovári Olgešbellodaga 1.evttohas Ellen Inga O. Hætta lohká sin bellodaga sáhttit bargat ovttas vaikko geainna.

Muhto Ronny Wilhelmsena oaidnu ruvkeáššiid hárrái, ii geasut Hætta.

Dattege dovddasta ahte maiddá Olgešbellodagas leat iešguđet oainnut.

– Mis leat olbmot geat lohket ahte boazodoallu ja ruvkedoaibma heiveba ovtta saddjái. Muhto bealistan jáhkán mus lea eanemus gelbbolašvuohta dán árvvoštallat, go lean bargan boazodoallohoavdan gávcci jagi, čilge Hætta.

Háliida čorgatvuođa

Son doaivu Sámedikki oažžut eambbo bissovaš politihkalaš dili go vássán áigodagas.

– Čorgatvuohta ja buorre siskkáldas gulahallan lea dehálaš jus Sámedikkis galgá leat buorre beaggin, lohká Hætta.

Dan háliida maid Åarjel Sámegïehl listtu 1.evttohas Ellinor Marit Jåma. Lohká iežaset váimmu leat lagat NSRa go Bargiidbellodaga.

– Jus gártat válljet, de doarjut NSRa, loká Jåma.

Ii hálit ii goappáge

Davvikalohtaálbmoga 1.evttohas Davveguovllu válgabires, Toril Bakken Kåven, ii hálit ovttasbarggu ii goappáge bellodagain.

– Guktot bellodagat, sihke Bargiidbellodat ja NSRa, ferteba eallit min doarjaga haga, lohká Kåven.

Davvikalohtaálbmot listtus lea fuones vásáhusat maŋimuš geardde go barge ovttas Bargiidbellodagain.

– Sii bálkestedje min olggos ovttasbarggus eahpevuoiggalaš sivaid geažil, čuožžuha Kåven.

– NSR + Bb eanemus lunddolaš

Dattege ii eahpit ahte Davvikalohtaálbmoga politihkka lea lagat Bargiidbellodaga go NSR:a.

Seammás su ge mielas lea váttis gávdnat daid stuorra earáhusaid Bb ja NSR politihka gaskkas.

– Danin livččii eanemus lunddolaš ahte dát guokte bellodaga manašeigga náittosdillái, oaivvilda Bakken Kåven.

Ohcá eará molssaeavttuid

So mielas sáhttet gávdnot maid eará molssaeavttut go Bargiidbellodat ja NSR.

– Jus Guovddášbellodat ja Dáloniid lista beassaba Sámediggái, de dat nannešii ain eambbo smávvabellodagaid vejolašvuođaid bargat ovttas, oaivvila Bakken Kåven.

Maiddái Árja, Olgešbellodat, Johttisápmelaččaid listu ja Ovddádusbellodat doivot smávvabellodagaid sáhttit bargat ovttas.

Šiella ovddasteaddji ja dálá sámediggepresideantta Vibeke Larsena mielas ges dálá dilis duođalaččat eai gávdno go guokte molssaeavttu presideantaámmáhii, namma lassii Ronny Wilhelmsen dahje Aili Keskitalo.