Fovse-ášši: Ráđđehus ii dáhto olgguldas guorahallama
Fovse-akšunisttat, Sosialisttalaš Guovddášbellodat ja Sámediggi dáhttot Fovse-ášši guorahallojuvvot álggus gitta lohppii. Dan ii dáhto ráđđehus, vástida energiijaministtar Terje Aasland e-poasttas NRK:i
Ráđđehus lea álggahan máŋga guorahallanbarggu boazodoalu- ja energiijadoaibmabidjopáhka olis, mii ovddiduvvui ovdal juovllaid. Dáin guorahallamiin áigot atnit Fovse-ášši oahppun mo boahtte áiggis dustet dákkáraš áššiid, vástida Aasland. Earret eará:
Buoret oppalašgova oažžut mo boazodoallu geavaha areálaid ođasmahttojuvvon areálageavahankárttaid ja boazodoalu orohatplánaid bokte.
Ráhkadit bagadusa, mii čilge mo oassálastin dáhpáhuvvá konsešuvdnaproseassain, ja mo galgá oktiiheivehit konsultašuvnnaid áššiin, mat meannuduvvojit plána- ja huksenlága ja energiijalága vuođul.
Rievdadit proseassanjuolggadusaid vai árrat juo lea vejolaš oaidnit ahte leago mearrádus lobálaš vai ii, ja ahte dat čatnet áššái gullevaččaid. Nu sáhttit garvit dakkár dili ahte duopmostuolut fámohuhttet mearrádusa maŋit áiggis go stuorra investeremat leat dahkkon.
