Fovse-ášši: Dáhttu bealátkeahtes guorahallama
Hilde Marie Gaebpie Danielsen, Mátta-Trøndelága Sosialisttalaš Gurutbellodaga (SG) Stuorradikki 1. várrelahttu evttoha bealátkeahtes guorahallama Fovse-áššis.
– Mii háliidat dákkár guorahallama, nu mo Sámediggige, danin go Stuorradikkis ja ráđđehusas lea leamaš menddo olu dahkamuš dán ášši proseassain ja mearrádusaiguin mat leat dahkkon, dadjá Gaebpie Danielsen.
Earret eará dáhttot guorahallamis dáidda gažaldagaide vástádusaid:
- Mo sáhttá Norgga riektestáhta šaddat dan dillái ahte Fovse boazosámiid olmmošvuoigatvuođat rihkkojuvvojit?
- Makkár olmmošvuoigatvuođamáhttu lea sis, geat addet konsešuvnnaid dánlágan huksemiidda, ja mo dan sáhttá buoredit?
- Makkár váikkuhusat leat ovddalgihtii álggahanlobi addimis guovlluide, gos dat lágalaš vuođđu ii leat čielggaduvvon?
- Manne manne bealgoalmmat jagi ovdalgo ášši čovdojuvvui?
- Evttohusat doaibmabijuide, mat hehttejit olmmošvuoigatvuođarihkkumiid dáhpáhuvvamis fas.
– Dása dárbbašat sierra, bealátkeahtes joavkku, mii guorahallá ášši álggu rájes gitta otná beaivái. Dát lea ollu buoret go dat ahte Stuorradiggi ja ráđđehus guorahalašedje iežaset, dadjá Gaebpie Danielsen.