Áhkkorohki veahkehii su garra gilvvus

Porsáŋgulaš Heidi Persdatter Greiner Haaker (55) lea birgen bures TV2-ráiddus Farmenis.

Gávcci vahkku lea son gilvvohallan tv-ráiddus masa leat čohkken 14 oasseváldi geat galget eallit nu go dahke 100 jagi áigi.

Gilvu bistá badjel guokte mánu, ja vuoitun lea barta ja biila.

Greiner Haaker lea iežas gávvil- ja hilbesvuođain sihke hirpmáhuhtten ja moivváidahttán eará oasseváldiid.

– Okte mun fáhkka muitalin sidjiide ahte mu namma lea Merete ja ahte orun okto muhtin vuovddis.

– Ja buohkat jáhkke dasa!

– Sin mielas mun várra ledjen jalla, muhto mun nu loavttán go beasan dádjut ja «pranket», reašká son.

Noaidi

Dát sámi nisu ii máhte dušše suohttasiid ráhkadit. Son maiddái oaivvilda ahte gulahallá iežas máttuiguin ja sámi vuoiŋŋaiguin.

Haaker lea noaidi, ja danne baladišgohte eará oasseváldit sus.

– Nabai jus son oažžu veahki dain sámi ipmiliin, heađástuvai gilvaleaddji Amalie Lund (23), ovdalaš tvekamp-gilvvu.

– Ii leat buorre diehtit dieid sámi ipmiliid, dadjá Lund.

«Tvekamp» lea gilvu mas guovttes gilvaleaba, ja vuoittáhalli geavvá eret Farmenis.

Áhkkorohki dearvuođat adde fámuid

Vaikko ii oktage dain eará oasseváldiin lean vuordán dan, de Greiner Haaker vuittii tvekamp-gilvvu Lund vuosttá.

Ieš lohká ahte son oaččui veahki oaidnemeahttumiin.

– Ovdalaš gilvvuid mun láven jearrat veahki iežan máttuin, sámi vuoiŋŋain ja eará vehkiin. Nu dahken dien háve maid, čilge Haaker.

TV:s oidno ahte prográmmajođiheaddji Mads Hansen buvttii Haaker Greinerii dearvuođaid muhtin «Sofies».

– Mads várra dušše leaikkastalai, muhto munnje lei hui garra duođaštussan ahte «sii» (vuoiŋŋat) leat dáppe, muitala Greiner Haaker.

Son ii bálljo gávnna sániid go galgá čilget man earenomáš vásáhus dát lei.

– Mu áhkku lei dat olmmoš gii eanemusat jáhkii ja oskui vuoiŋŋaide, muitala Haaker, guhte ain dovdá ahte gorut galmmista go jurddaša dien vásáhusa birra.

– Lea áibbas sihkar ahte ožžon veahki dien gilvvus, dadjá Haaker.

Soaittáhagas lohken Sofie

Prográmmajođiheaddji Mads Hansen lohká iežas muitit dien dáhpáhusa.

– Lei dušše leaika. Mahkáš ahte Amalie maid lea lonuhan nama, nu movt Heidi lei, čilge Hansen.

Son eahpida ahte lei Haakera áhkku gii celkkii dearvvuođaid su bokte. Dadjá ahte baicca dáhpedorpmis dajai juste dien nama.

– Muhto Heidi han vuitti, ja dat dáidá de sutnje addán juoidá, dadjá Hansen.

Ovddeš gilvaleaddji čuovvu mielde

Jagi 2007 vuittii Guovdageaidnulaš Mikkel Isak Eira Farmenis, ja šattai ge dat vuosttaš sápmelaš gii lea vuoitán juste dán gilvvu.

Son lohká veaháš geahččan Farmena dán jagi, ja ahte šaddá gelddolaš oaidnit gii vuoitá.

Fysalaččat gal soitet earát gievrrabut, dadjá Eira gii ii duostta lohkat leat go Haakeris earenomáš attáldagat.

– In duostta dadjat leat go vuoi eai, muhto go earáid lea ožžon jáhkkit dasa, de soaitá ávkin, loahpaha son.

Eira geavahii ieš gávvilvuođa ja einnosteami balddáhallat earáid.

Árdna TV-prográmmas muitalii muhtin fearániid.

• GEAHČA: Mikkel Isak Árdna-TVs

De leaš oaidnit šaddá go fas sápmelaš vuoiti Farmenis.

Finála lea juovlamánu 5. beaivvi.