Unnit nuorat go boaránat Sámedikki jienastuslogus

Nordkalottfolket evttoha ahte Sámediggi berrešii sáddet diehtojuohkinreivve sámediggejienasteddjiid mánáide, mas muitalit mo dieđiha Sámedikki válgajienastuslohkui, čállá Ávvir (máksu gáibiduvvo).

– Jienastuslogus leat unnit nuorat go mii boaránat. Min sávaldat lea ahte Sámedikkis lea máŋggabealatvuohta, dadjá bellodaga sámediggeáirras Vibeke Larsen áviisii.

Norgga Sámiid Riikasearvvi (NSR) parlamentáralaš jođiheaddji, Beaska Niillas, doarju evttohusa.

– Mu mielas lea buorre jurdda, lohká Beaska Niillas.

Helga Pedersen lea ožžon ođđa njunušbarggu

Ovddeš Bb-njunuš ja Deanu sátnejođiheaddji, Helga Pedersen, lea ožžon ođđa barggu. Son lea Finnmárkku Boanddaidsearvvi ođđa organisašuvdnahoavda, čállá VG.

– Boanddaidsearvi lea boanddaid deháleamos sáhkaguoddi. Dán jovkui lea mus miella gullat, dadjá Pedersen Boanddaidsearvvi neahttasiidui.

Pedersen lei Bargiidbellodaga nubbejođiheaddji 2007-2015, ja guolástus- ja riddoministtar 2005-2009.

Son lei ruovttugieldda Deanu sátnejođiheaddji gitta dán jagi čakčii.

Les på norsk

Makkár kulturásahusat Norggas barget sámi dáidagiin ja kultuvrrain

Dál leat unnán dieđut das man olu ja man láhkái Norgga dáidda- ja kulturásahusat barget sámi dáidagiin ja kultuvrrain.

Okta čilgehusain lea ahte dát ii vel leat suokkardallon. Dáinna háliidit Sámediggi, Sámiráđđi ja Kulturdirektoráhtta dahkat juoidá.

Danne sáddejuvvo boahtte vahkus riikkaviidosaš iskkadeapmi dáidda- ja kulturásahusaide.

Geassit nannii duohtavuođa- ja seanadankommišuvdna, ahte dáruiduhttin lea guhká ja duođalaččat čuohcan sámi kultuvrii ja gillii. Dáruiduhttin bistá ain Norggas.

– Dan mii iskkadeamis gávnnahuvvo šaddá rápportan. Dalle oaidnit mat kulturásahusat barget sámi dáidda- ja kulturovdánbuktimiin dál. Dasa lassin mat kulturásahusat háliidivčče dáinna bargat, muhto eai áibbas dieđe manne ja mat ásahusat eai vel leat dáinna nu olu bargan.

Dan čilge Kulturdirektoráhta direktevra, Kristin Danielsen (govas).

Les på norsk

Áigot iskat manne olbmot guđđet Sámedikki jienastuslogu

Telemarksforskning lea ožžon bargun guorahallat manne olbmot geat iežaset leat dieđihan Sámedikki jienastuslohkui guđđet fas dan.

Sii galget maid anonyma kártema bokte jienasteaddjiid gaskkas guorahallat leatgo subjektiivva gáibádus ja objektiivva gáibádusat ollašuvvan.

Prošeavtta mihttu lea háhkat dieđuid mat šaddet mávssolažžan Sámedikki viidáset bargui válggaiguin ja jienastusloguin.

Les på norsk

Vuoruhit sámevaši eastadeami

Ráđđehus lea bargagoahtán sierra doaibmaplánain sámevaši eastadeami hárrái. Plána galgá leat gárvvis boahtte jagi.

Dan logai kultur- ja dásseárvoministtar Lubna Jaffery (Bb) sáhkavuorustis Sámedikki dievasčoahkkimii otne.

Ráđđehus lea aitto ovddidan sierra doaibmaplána rasismma ja vealaheami eastadeapmái ja das namuhuvvui sámevašši. Máŋggas sámedikkis oaivvildedje ahte ráđđehus ferte bargat eanet dáinna ja ministtar dajaige daninassii álggahan dán barggu.